ડલ્લાસ, તા. 8: અમેરિકાના સૌથી ઝડપથી વિકસતા રાજ્ય ટેક્સાસમાં હવે પ્રખ્યાત 'પર્કિન્સ રેસ્ટોરન્ટ એન્ડ બેકરી'નો સ્વાદ માણવા મળશે. આ લોકપ્રિય બ્રાન્ડને ટેક્સાસના બજારમાં લાવવાનું નેતૃત્વ ભારતીય અમેરિકન ફ્રેન્ચાઇઝર્સનું જૂથ કરી રહ્યું છે. નરેન પટેલ, બંસરી પટેલ અને ચેતના પટેલના નેતૃત્વ હેઠળના 'રાજ DFW LLC' એ ટેક્સાસમાં ત્રણ નવા યુનિટ ખોલવા માટે કરાર કર્યા છે, જે ભારતીય સમુદાય માટે ગૌરવની વાત છે.
કેરોલટનથી થશે શરૂઆત
આ પ્રોજેક્ટ હેઠળ પ્રથમ રેસ્ટોરન્ટ ટેક્સાસના કેરોલટન વિસ્તારમાં ખુલશે. જેનું બાંધકામ 2026 ના વસંતમાં શરૂ થવાની ધારણા છે. પર્કિન્સ રેસ્ટોરન્ટ તેના આખો દિવસ મળતા નાસ્તા (All-day Breakfast) અને તાજી બેકરી વસ્તુઓ માટે અમેરિકામાં ખૂબ જ જાણીતું છે. કેન્સાસમાં પહેલેથી જ પર્કિન્સ સાથે જોડાયેલા નરેન પટેલે આ અંગે ઉત્સાહ વ્યક્ત કરતા જણાવ્યું હતું કે, "અમે ટેક્સાસના બજારમાં આ પ્રતિષ્ઠિત બ્રાન્ડ રજૂ કરવા માટે ખૂબ જ આતુર છીએ."
નવો લુક અને આધુનિક અનુભવ
ટેક્સાસમાં ખુલનારી આ ત્રણેય રેસ્ટોરાં પર્કિન્સના લેટેસ્ટ 'પ્રોટોટાઇપ' મોડેલ પર આધારિત હશે. જેમાં બ્રાન્ડની જૂની અને જાણીતી ઓળખને જાળવી રાખીને તેને આધુનિક ડિઝાઇન અને અપડેટેડ મેનૂ સાથે રજૂ કરવામાં આવશે. કંપનીનો ઉદ્દેશ્ય જૂના ગ્રાહકોની સાથે સાથે આજના આધુનિક યુવા વર્ગને પણ આકર્ષવાનો છે.
ભારતીય ઉદ્યોગસાહસિકોનું વધતું વર્ચસ્વ
એસેન્ટ હોસ્પિટાલિટી મેનેજમેન્ટના મુખ્ય વિકાસ અધિકારી પીટર ઓર્ટિઝે આ ભાગીદારીને બિરદાવતા કહ્યું હતું કે, "બંસરી, ચેતના અને નરેન જેવા અનુભવી સાથીઓ સાથે મળીને ટેક્સાસ જેવા મુખ્ય બજારમાં પ્રવેશ કરવો એ અમારા માટે સન્માનની વાત છે."
ઉલ્લેખનીય છે કે, અમેરિકામાં ડંકિન (Dunkin') જેવી મોટી બ્રાન્ડ્સના ફ્રેન્ચાઇઝી બોર્ડમાં પણ ભારતીય અમેરિકનો મહત્વની ભૂમિકા ભજવી રહ્યા છે. હવે પર્કિન્સના આ વિસ્તરણથી ટેક્સાસના મેટ્રોપ્લેક્સ વિસ્તારમાં રોજગારીની નવી તકો પણ ઉભી થશે અને લોકોને ઉત્તમ આતિથ્ય સાથે સ્વાદિષ્ટ ભોજન મળશે.