બેંગલુરુ : દેશની આઈટી રાજધાની ગણાતા બેંગલુરુ શહેરમાંથી એક અત્યંત વિચિત્ર અને ડરામણો વીડિયો સામે આવ્યો છે. બાગલુર વિસ્તારમાં એક યુવક રસ્તાની બાજુમાં કોઈ પણ જાતની હિલચાલ વગર, લાંબા સમય સુધી ગતિહીન ઉભો રહેતા સ્થાનિકોમાં કુતૂહલ અને ચિંતા ફેલાઈ છે. આ ઘટનાનો વીડિયો સોશિયલ મીડિયા પ્લેટફોર્મ X પર વાયરલ થતા જ લોકો તેને ખતરનાક 'ઝોમ્બી ડ્રગ' (Zombie Drug) સાથે જોડી રહ્યા છે.
શું છે આ 'ઝોમ્બી ડ્રગ'નો ખતરો?
વીડિયો વાયરલ થતા જ નેટિઝન્સ દાવો કરી રહ્યા છે કે આ વ્યક્તિ 'ઝાયલાઝિન' (Xylazine) નામના નશાનો શિકાર બની છે. આ એક એવું ડ્રગ છે જે પશુઓને બેહોશ કરવા માટે વપરાય છે, પરંતુ તેને હેરોઈન કે અન્ય ઓપીઓઈડ્સ સાથે ભેળવીને લેવાથી મનુષ્ય 'ટ્રાન્સ' જેવી સ્થિતિમાં જતો રહે છે. આવી વ્યક્તિ લાંબા સમય સુધી એક જ સ્થિતિમાં પથ્થરની જેમ જડ થઈ જાય છે, જેના કારણે તેને વિદેશમાં 'ઝોમ્બી ડ્રગ' તરીકે ઓળખવામાં આવે છે. જોકે, હજુ સુધી સત્તાવાર રીતે આ બાબતની પુષ્ટિ થઈ નથી.
પોલીસ એક્શન મોડમાં
વીડિયોની ગંભીરતાને જોતા બેંગલુરુના યેલાહંકા પોલીસ સ્ટેશને આ બાબતે તપાસ શરૂ કરી છે. પોલીસે સોશિયલ મીડિયા પર વિગતો માંગતા જણાવ્યું છે કે આ ઘટનાના મૂળ સુધી પહોંચવા માટે પ્રયાસો ચાલુ છે. અધિકારીઓએ નાગરિકોને વિનંતી કરી છે કે પુષ્ટિ વગરના દાવાઓ પર વિશ્વાસ ન કરવો અને અફવાઓ ફેલાવવી નહીં.
ચંદીગઢની ઘટના સાથે સામ્યતા
થોડા દિવસો પહેલા ચંદીગઢના સેક્ટર 33B માં પણ આવી જ ઘટના બની હતી. ત્યાં એક ડિલિવરી બોય લગભગ બે કલાક સુધી રસ્તા વચ્ચે ગતિહીન ઉભો રહ્યો હતો. તેને તબીબી તપાસ માટે લઈ જવામાં આવ્યો હતો, જોકે ત્યાં પણ ડ્રગ્સની સંડોવણી સાબિત થઈ ન હતી. આરોગ્ય નિષ્ણાતોનું કહેવું છે કે કોઈ વ્યક્તિ આ રીતે સ્થિર થઈ જાય તેના પાછળ માનસિક બીમારી, ડિહાઇડ્રેશન, અતિશય થાક કે ન્યુરોલોજીકલ સમસ્યાઓ પણ હોઈ શકે છે.
બેંગલુરુની આ ઘટનાએ ડ્રગ્સના વધતા દૂષણ અને યુવા પેઢી પર તેની ઘાતક અસરો અંગે ફરી એકવાર ગંભીર ચર્ચા છેડી દીધી છે. પોલીસ તપાસમાં જ બહાર આવશે કે આ ખરેખર નશાનું પરિણામ છે કે કોઈ તબીબી કટોકટી.