વોશિંગ્ટન : અમેરિકા અને ઈરાન વચ્ચે હાલમાં જ જાહેર થયેલા બે અઠવાડિયાના યુદ્ધવિરામ અંગે ચાલી રહેલી વ્હાઇટ હાઉસની બ્રીફિંગમાં અણધાર્યા દ્રશ્યો જોવા મળ્યા હતા. યુએસ સંરક્ષણ સચિવ પીટ હેગસેથ એક પત્રકારના પ્રશ્નથી એટલા ઉશ્કેરાઈ ગયા હતા કે તેમણે બ્રીફિંગની મધ્યમાં જ પત્રકારને તેની વર્તણૂક વિશે સવાલ કરી દીધો હતો. આ ક્ષણનો વીડિયો સોશિયલ મીડિયા પર અત્યંત ઝડપથી વાયરલ થઈ રહ્યો છે.
શું હતી સમગ્ર ઘટના?
બ્રીફિંગ દરમિયાન એક રિપોર્ટરે ઈરાનની ગતિવિધિઓ પર સવાલ ઉઠાવતા પૂછ્યું કે, જો યુદ્ધવિરામ અમલમાં છે તો હજુ પણ બેલિસ્ટિક મિસાઇલ પ્રવૃત્તિઓ કેમ ચાલુ છે? આ સવાલ પૂછતી વખતે પત્રકાર અને હેગસેથ વચ્ચે વાત કાપવા બાબતે ખેંચતાણ થઈ હતી. હેગસેથે હતાશામાં પત્રકારની વાત કાપતા કહ્યું, "તમે આટલા અસંસ્કારી (Rude) કેમ છો? બસ રાહ જુઓ." પત્રકારે બોલવાનું ચાલુ રાખતા હેગસેથે ફરી એકવાર બડબડાટ કરતા કહ્યું હતું કે, "આટલા અસંસ્કારી કેમ છો?"
ઈરાન પર દબાણ અને ટ્રમ્પની 'દયા'
આ તણાવપૂર્ણ વાતચીત સિવાય હેગસેથે અમેરિકાની લશ્કરી કાર્યવાહીનો જોરદાર બચાવ કર્યો હતો. તેમણે જણાવ્યું હતું કે ઈરાન યુદ્ધવિરામ માટે એટલે સંમત થયું કારણ કે અમેરિકાએ તેમના પર ભારે દબાણ બનાવ્યું હતું. તેમની પાસે બીજો કોઈ વિકલ્પ બચ્યો નહોતો. હેગસેથે વધુમાં ઉમેર્યું કે, રાષ્ટ્રપતિ ડોનાલ્ડ ટ્રમ્પે હુમલાઓ અટકાવીને ઈરાન પર 'દયા' બતાવી છે, કારણ કે તેહરાને યુદ્ધવિરામની શરતો સ્વીકારી લીધી હતી.
મિસાઇલ પ્રોગ્રામના વિનાશનો દાવો
સંરક્ષણ સચિવે દાવો કર્યો હતો કે અમેરિકાના હુમલાઓએ ઈરાનની સૈન્ય તાકાતને જમીનદોસ્ત કરી દીધી છે. તેમણે ભારપૂર્વક જણાવ્યું કે, "ઈરાનનો મિસાઇલ પ્રોગ્રામ હવે કાર્યાત્મક રીતે નાશ પામ્યો છે." અમેરિકાએ ઈરાનના સંરક્ષણ ઉદ્યોગના મુખ્ય પાયા પર જ પ્રહાર કર્યો છે, જેના કારણે તેમની વળતો હુમલો કરવાની ક્ષમતા નબળી પડી ગઈ છે.
આમ, એકતરફ યુદ્ધવિરામના કારણે શાંતિની આશા જન્મી છે, ત્યારે બીજી તરફ વ્હાઇટ હાઉસમાં વહીવટીતંત્ર અને મીડિયા વચ્ચેનો આ તણાવ ચર્ચાનો વિષય બન્યો છે.