નવી દિલ્હી:  વૈશ્વિક સ્તરે જ્યારે યુદ્ધના વાદળો ઘેરાયેલા છે અને મધ્ય પૂર્વમાં ઈરાન-ઈઝરાયલ સંઘર્ષને કારણે ઊર્જા બજારોમાં ભારે અસ્થિરતા જોવા મળી રહી છે, ત્યારે ભારત માટે આર્થિક મોરચે ખૂબ જ ઉત્સાહજનક સમાચાર આવ્યા છે. વિશ્વ બેંકે તેના તાજેતરના 'દક્ષિણ એશિયા આર્થિક અપડેટ'માં ભારતની મજબૂતીનો સ્વીકાર કરતા નાણાકીય વર્ષ 2026-27 માટે GDP વૃદ્ધિ દરનો અંદાજ 6.3 ટકાથી વધારીને 6.6 ટકા કર્યો છે. આ સુધારો એ વાતની સાબિતી છે કે વૈશ્વિક સંકટો વચ્ચે પણ ભારતનું આંતરિક અર્થતંત્ર અને સરકારી નીતિઓ વિકાસની ગતિ જાળવી રાખવા માટે સક્ષમ છે, જે રોકાણકારો માટે એક પોઝિટિવ સિગ્નલ માનવામાં આવે છે.

બીજી તરફ, વિશ્વ બેંકે સમગ્ર દક્ષિણ એશિયાના સરેરાશ વિકાસ દર અંગે ચિંતા વ્યક્ત કરી છે. અહેવાલ મુજબ, આ પ્રદેશનો એકંદર વિકાસ દર જે 2025માં 7.0 ટકા હતો, તે 2026માં ઘટીને 6.3 ટકા થવાની ધારણા છે. પાડોશી દેશોની સરખામણીએ ભારતની સ્થિતિ વધુ સ્થિર છે, કારણ કે અન્ય રાષ્ટ્રો આયાતી ઈંધણ પર વધુ નિર્ભર છે અને મોંઘવારીના માર સામે ઝઝૂમી રહ્યા છે. વિશ્વ બેંકે સ્પષ્ટ કર્યું છે કે ભારત માત્ર આ પ્રદેશનો સૌથી મોટો દેશ જ નથી, પરંતુ પ્રતિકૂળ સંજોગોમાં પણ સ્થિતિસ્થાપકતા બતાવનાર મુખ્ય અર્થતંત્ર છે, જે તેને ગ્લોબલ માર્કેટમાં એક સુરક્ષિત ટાપુ બનાવે છે.

જોકે, આ તેજ રફ્તાર વચ્ચે વિશ્વ બેંકે કેટલીક ગંભીર ચેતવણીઓ પણ આપી છે. બેંકના મતે મધ્ય પૂર્વમાં ચાલી રહેલું યુદ્ધ જો લાંબુ ખેંચાય તો તેલના ભાવમાં અણધાર્યો ઉછાળો આવી શકે છે, જે ભારત જેવા મોટા આયાતકાર દેશ માટે મોંઘવારીનું જોખમ ઉભું કરી શકે છે. આ ઉપરાંત, બદલાતી નાણાકીય નીતિઓ અને વૈશ્વિક સપ્લાય ચેઈનમાં આવતા અવરોધોને કારણે વિકાસના માર્ગમાં રોડા આવી શકે છે. ભવિષ્યની આ અનિશ્ચિતતાઓ સામે સાવધ રહેતા, ભારતે તેની રાજકોષીય શિસ્ત જાળવી રાખવી પડશે જેથી વૈશ્વિક ઝટકાઓની અસર ઓછામાં ઓછી થાય.