ગુવાહાટી: તા.૯ આસામમાં ૧૨૬ બેઠકો માટે વિધાનસભા ચૂંટણીનું મતદાન ચાલી રહ્યું છે, પરંતુ આ મહાજંગ વચ્ચે મુખ્યમંત્રી હિમંતા બિસ્વા સરમાનો એક ઈન્ટરવ્યુ સોશિયલ મીડિયા પર જોરદાર ચર્ચા જગાવી રહ્યો છે. મતદાનના દિવસે પત્રકારો સાથે વાતચીત કરતી વખતે જ્યારે પ્રચાર દરમિયાન વપરાયેલી ભાષા વિશે સવાલ પૂછવામાં આવ્યો, ત્યારે મુખ્યમંત્રી પોતાનો પિત્તો ગુમાવી બેઠા હતા અને રિપોર્ટર સાથે તેમની સીધી ટક્કર થઈ ગઈ હતી.

કેવી રીતે શરૂ થઈ બોલાચાલી?

ડિજિટલ ન્યૂઝ પોર્ટલ ‘લલ્લનટોપ’ના પત્રકારે મુખ્યમંત્રીને સવાલ પૂછ્યો હતો કે, શું તેમને લાગે છે કે પ્રચારના છેલ્લા તબક્કા દરમિયાન તેમણે ‘બિનસંસદીય’ ભાષાનો પ્રયોગ કર્યો હતો? આ સાંભળતા જ હિમંતા બિસ્વા સરમા ઉશ્કેરાઈ ગયા હતા. તેમણે વળતો જવાબ આપતા કહ્યું કે, “મારી ભાષા હંમેશા લલ્લનટોપ કરતાં સારી હોય છે.”

‘મને સર્ટિફિકેટની જરૂર નથી’

મુખ્યમંત્રીના આ નિવેદન પર પત્રકારે પણ તરત જવાબ આપ્યો કે, “લલ્લનટોપને તમારા તરફથી કોઈ પ્રમાણપત્રની જરૂર નથી.” જેના પર વધુ ગુસ્સે થઈને મુખ્યમંત્રીએ કહ્યું, “તો મને પણ તમારી પાસેથી કોઈ સર્ટિફિકેટ નથી જોઈતું!” વાત અહીં જ ન અટકી, હિમંતાએ કટાક્ષ કરતા પૂછ્યું કે, “આ લલ્લનટોપ વળી શું ચીજ છે? મેં તો આવું ક્યારેય જોયું નથી.”

આસામ ચૂંટણીના આંકડા

એકતરફ આ રાજકીય ગરમાગરમી ચાલી રહી છે, તો બીજી તરફ મેદાનમાં ભાવિ નક્કી થઈ રહ્યું છે:

· કુલ બેઠકો: ૧૨૬ સભ્યોની વિધાનસભા.

· મતદારો: ૨.૫ કરોડથી વધુ લોકો મતાધિકારનો ઉપયોગ કરવા લાયક.

· ઉમેદવારો: ૭૨૨ દિગ્ગજો મેદાનમાં છે.

· પરિણામ: ૪ મેના રોજ મતગણતરી હાથ ધરાશે.

ચૂંટણીના માહોલમાં નેતાઓ અને મીડિયા વચ્ચેની આવી ખેંચતાણ નવી વાત નથી, પરંતુ હિમંતા બિસ્વા સરમાનો આ અંદાજ અત્યારે આસામથી લઈને દિલ્હી સુધી ચર્ચાનો વિષય બન્યો છે. હવે જોવાનું એ રહેશે કે ૪ મેના રોજ જનતા કોને સત્તાનું ‘પ્રમાણપત્ર’ આપે છે!