નવી દિલ્હી:  ભારતમાં રહેતા કરોડો લોકો માટે સૌથી મહત્વનો દસ્તાવેજ ગણાતા ‘આધાર’ કાર્ડને લઈને સુપ્રીમ કોર્ટમાં એક મહત્વપૂર્ણ જાહેર હિતની અરજી (PIL) દાખલ કરવામાં આવી છે. આ અરજીમાં માંગ કરવામાં આવી છે કે ભારતીય વિશિષ્ટ ઓળખ સત્તામંડળ (UIDAI) એ આધાર કાર્ડ જારી કરવાના નિયમોમાં કડક ફેરફાર કરવા જોઈએ, જેથી વિદેશી ઘૂસણખોરો તેનો ઉપયોગ કરીને પોતાની ઓળખ ભારતીય નાગરિક તરીકે પ્રસ્થાપિત ન કરી શકે.

બાળકો અને પુખ્ત વયના લોકો માટે અલગ નિયમોની માંગ

જાણીતા વકીલ અશ્વિની ઉપાધ્યાય દ્વારા દાખલ કરવામાં આવેલી આ અરજીમાં બે મુખ્ય માંગણીઓ કરવામાં આવી છે:

૧. નાના બાળકો: ૬ વર્ષ સુધીના બાળકોને નવા આધાર કાર્ડ જારી કરવા પર તાત્કાલિક પ્રતિબંધ મૂકવો જોઈએ.

૨. પુખ્ત વયના લોકો: કિશોરો અને પુખ્ત વયના લોકો માટે આધાર જારી કરતા પહેલા અત્યંત કડક માર્ગદર્શિકા ઘડવી જોઈએ, જેથી કોઈ પણ શંકાસ્પદ વ્યક્તિ છેતરપિંડીથી આ દસ્તાવેજ ન મેળવી શકે.

આધાર ‘નાગરિકતા’નો પુરાવો નથી

અરજીમાં એ વાત પર ખાસ ભાર મૂકવામાં આવ્યો છે કે, દરેક કોમન સર્વિસ સેન્ટર (CSC) પર ડિસ્પ્લે બોર્ડ લગાવવા જોઈએ જેમાં સ્પષ્ટ લખ્યું હોય કે: આધાર નંબર માત્ર 'ઓળખનો પુરાવો' છે. તે નાગરિકતા, રહેઠાણ કે જન્મ તારીખ સાબિત કરતો દસ્તાવેજ નથી. અરજદારની દલીલ છે કે આધારનો ઉપયોગ કરીને લોકો રેશન કાર્ડ, ડોમિસાઇલ અને વોટર આઈડી કાર્ડ જેવા અન્ય દસ્તાવેજો સહેલાઈથી બનાવી લે છે, જે રાષ્ટ્રીય સુરક્ષા માટે જોખમ ઊભું કરી શકે છે.

૧૪૪ કરોડ આધાર કાર્ડ અને ઘૂસણખોરીનો ડર

અરજીમાં જણાવવામાં આવ્યું છે કે અત્યાર સુધીમાં અંદાજે ૧૪૪ કરોડ આધાર કાર્ડ જારી થઈ ચૂક્યા છે, જે ભારતની વસ્તીના ૯૯ ટકા જેટલા છે. વકીલ અશ્વની દુબે દ્વારા રજૂ કરવામાં આવેલી આ અરજીમાં ગૃહ મંત્રાલય, કાયદા મંત્રાલય અને UIDAI ને પક્ષકાર બનાવવામાં આવ્યા છે. દલીલ મુજબ, જો હવે નવા આધાર કાર્ડ આપવા પર કડક નિયંત્રણો નહીં મૂકવામાં આવે, તો ઘૂસણખોરો વેશપલટો કરીને ભારતીય વ્યવસ્થાનો ભાગ બની જશે.

હવે જોવાનું એ રહેશે કે સુપ્રીમ કોર્ટ આ મામલે કેન્દ્ર સરકાર અને UIDAI પાસે શું જવાબ માંગે છે અને ભવિષ્યમાં આધાર કાર્ડ મેળવવાની પ્રક્રિયા કેટલી જટિલ બનશે.