વોશિંગ્ટન | તા.૧૦: અમેરિકાના સંરક્ષણ મંત્રાલય એટલે કે પેન્ટાગોન અને મીડિયા જગત વચ્ચે ચાલી રહેલો સંઘર્ષ હવે ચરમસીમાએ પહોંચ્યો છે. યુએસ ડિસ્ટ્રિક્ટ જજ પોલ ફ્રીડમેને 9 એપ્રિલના રોજ એક ઐતિહાસિક ચુકાદો આપતા સ્પષ્ટ કર્યું છે કે પેન્ટાગોન જાણીજોઈને કોર્ટના આદેશોનું ઉલ્લંઘન કરી રહ્યું છે. જજે સંરક્ષણ મંત્રાલયની ઝાટકણી કાઢતા કહ્યું કે, પત્રકારોને અટકાવવા માટે 'નવી નીતિ'ના બહાના હેઠળ ગેરકાયદેસર પ્રતિબંધો લાદવા એ ન્યાયતંત્રની અવગણના છે.
શું છે સમગ્ર વિવાદ?
આ વિવાદની શરૂઆત ત્યારે થઈ જ્યારે સંરક્ષણ સચિવ પીટ હેગસેથના નેતૃત્વ હેઠળ પેન્ટાગોને એક વિચિત્ર નિયમ બહાર પાડ્યો. આ નિયમ મુજબ, જો કોઈ પત્રકાર લશ્કરી કર્મચારીઓ પાસેથી ગુપ્ત કે વર્ગીકૃત માહિતી મેળવવાનો પ્રયાસ કરે, તો તેને 'સુરક્ષા જોખમ' ગણી શકાય છે. આ નીતિ હેઠળ 56 જેટલા મોટા સમાચાર સંગઠનો (જેમાં ન્યૂ યોર્ક ટાઇમ્સ અને રોઇટર્સ સામેલ છે) માંથી માત્ર એકે જ સહી કરી હતી, જ્યારે અન્ય પત્રકારોના પ્રેસ પાસ છીનવી લેવામાં આવ્યા હતા.
કોર્ટના આદેશને ઘોળીને પી જવાનો પ્રયાસ
માર્ચ મહિનામાં જજ ફ્રીડમેને આ નીતિને બંધારણ વિરોધી ગણાવીને પત્રકારોના પાસ તાત્કાલિક પાછા આપવા આદેશ આપ્યો હતો. જોકે, પેન્ટાગોને કોર્ટના આદેશનું પાલન કરવાને બદલે 'વચગાળાની નીતિ'ના નામે નવા અવરોધો ઉભા કર્યા. નવી શરતો મુજબ:
•    પત્રકારોએ બિલ્ડિંગમાં ફરવા માટે ફરજિયાત એસ્કોર્ટ (સાથે સુરક્ષાકર્મી) રાખવો પડશે.
•    સ્ત્રોતોની ગુપ્તતા જાળવવા પર નવા અંકુશો લાદવામાં આવ્યા.
•    કોર્ટે જે નિયમો રદ કર્યા હતા, તેને જ ફરીથી નવા સ્વરૂપે રજૂ કરવામાં આવ્યા.
લોકશાહીના ચોથા સ્તંભ પર હુમલો
ધ ન્યૂ યોર્ક ટાઇમ્સના પ્રવક્તાએ આ પગલાને પત્રકારોના કાનૂની અધિકારો છીનવવાનો "ખરાબ રીતે છુપાયેલો પ્રયાસ" ગણાવ્યો છે. પેન્ટાગોન પ્રેસ એસોસિએશને પણ આકરો વિરોધ નોંધાવતા કહ્યું છે કે મંત્રાલય કોર્ટના આદેશની ભાવના સાથે રમત રમી રહ્યું છે.
બીજી તરફ, પેન્ટાગોનના પ્રવક્તા સીન પાર્નેલે બચાવ કરતા જણાવ્યું છે કે તેઓ કોર્ટના આદેશનું પાલન કરી રહ્યા છે અને આ તાજેતરના ચુકાદા સામે ઉપલી કોર્ટમાં અપીલ કરશે. હાલ પૂરતું, જજ ફ્રીડમેને આદેશ આપ્યો છે કે મીડિયાને આપવામાં આવેલી છૂટછાટોમાં કોઈ કાપ મૂકવો એ કાયદેસર રીતે અમાન્ય ગણાશે.