મુંબઈ : મહારાષ્ટ્રના રાજકારણમાં બારામતી વિમાન દુર્ઘટનાને લઈને ફરી એકવાર વિવાદનો વંટોળ ઉઠ્યો છે. NCP (SP) ના ધારાસભ્ય રોહિત પવારે શુક્રવારે એક પછી એક અનેક સનસનીખેજ આક્ષેપો કરીને ખળભળાટ મચાવી દીધો છે. રોહિત પવારે VSR વેન્ચર્સ પ્રાઇવેટ લિમિટેડના માલિક વી. કે. સિંહ પર નિશાન સાધતા તેમને મહારાષ્ટ્ર સરકારના મોટા પ્રોજેક્ટ્સમાં "મધ્યસ્થી અથવા દલાલ" તરીકે ઓળખાવ્યા છે.
રજત શર્માના રિસેપ્શન અને VSR ફ્લાઇટનું કનેક્શન
રોહિત પવારે સોશિયલ મીડિયા પ્લેટફોર્મ X પર દાવો કર્યો છે કે, તાજેતરમાં દિલ્હીમાં પત્રકાર રજત શર્માની પુત્રીના લગ્ન રિસેપ્શનમાં હાજરી આપીને પરત ફરેલા મહારાષ્ટ્રના એક અત્યંત અગ્રણી નેતાએ VSR ની ફ્લાઇટનો ઉપયોગ કર્યો હતો. આશ્ચર્યની વાત એ છે કે, ખાનગી ટર્મિનલ પર વી. કે. સિંહે પોતે નેતાનું સ્વાગત કર્યું હતું અને તેમના પર્સનલ આસિસ્ટન્ટને કેટલાક ગુપ્ત દસ્તાવેજો સોંપ્યા હતા.
મૃતક પાયલટના પુત્રની ઉડાન પર આઘાત
આ ઘટનામાં સૌથી વધુ ચોંકાવનારો વળાંક ત્યારે આવ્યો જ્યારે રોહિત પવારે ખુલાસો કર્યો કે, "જે વિમાન દુર્ઘટનામાં અજિત દાદાનું મૃત્યુ થયું, તે જ પાયલટ કપૂરનો પુત્ર કેપ્ટન સુમિત કપૂર અત્યારે તે અગ્રણી નેતાની ફ્લાઇટ ઉડાવી રહ્યો છે." તેમણે સવાલ કર્યો હતો કે શું આ બધું આકસ્મિક છે કે કોઈ મોટા કાવતરાનો ભાગ?
અજિત પવારના મૃત્યુ પર CBI તપાસની માંગ
૨૮ જાન્યુઆરીના રોજ પુણેના બારામતી એરપોર્ટ પર લિયરજેટ ૪૫ વિમાન ક્રેશ થયું હતું, જેમાં અજિત પવાર સહિત પાંચ લોકોના કરૂણ મોત થયા હતા. રોહિત પવારે આરોપ લગાવ્યો છે કે શાસક પક્ષ આ મામલે મૌન સેવી રહ્યો છે અને કોઈ "મોટી શક્તિ" VSR વેન્ચર્સને બચાવી રહી છે. તેમણે આ સમગ્ર કેસની નિષ્પક્ષતાથી તપાસ કરવા માટે સેન્ટ્રલ બ્યુરો ઓફ ઇન્વેસ્ટિગેશન (CBI) ની માંગણીનું પુનરાવર્તન કર્યું છે.
સુરક્ષા અંગેની ચેતવણી
રોહિત પવારે રાજ્યના અન્ય નેતાઓને પણ ચેતવણી આપતા કહ્યું કે, "તમે અજિત દાદાના અકસ્માત કેસને હળવાશથી ન લો. VSR પર આટલો બધો વિશ્વાસ રાખવો જોખમી સાબિત થઈ શકે છે." કર્ણાટક પોલીસે આ મામલે શૂન્ય FIR નોંધીને કેસ મહારાષ્ટ્ર પોલીસને ટ્રાન્સફર કર્યો છે, પરંતુ હજુ સુધી કોઈ નક્કર કાર્યવાહી ન થતા રોહિત પવારે આક્રોશ વ્યક્ત કર્યો છે.
આ આક્ષેપો બાદ હવે મહારાષ્ટ્રના રાજકારણમાં નવા સમીકરણો રચાય તેવી શક્યતા છે, અને જોવાનું એ રહેશે કે સરકાર આ ગંભીર આરોપો પર શું પ્રતિક્રિયા આપે છે.