દીપ્તિબેન જાની દ્વારા, ન્યુજર્સી:અમેરિકાના ન્યુજર્સી સ્થિત બિનનફાકારક સંસ્થા ‘એસજીએમએલ આઈ હોસ્પિટલ યુએસએ ઇન્ક’ (SGML Eye Hospital USA, Inc.) દ્વારા આગામી રવિવાર, ૨૬ એપ્રિલ ૨૦૨૬ના રોજ ન્યુજર્સીના પ્રતિષ્ઠિત રોયલ આલ્બર્ટ પેલેસના નવા બેન્ક્વેટ હોલમાં એક ભવ્ય ગાલા ડિનર અને સંગીત સંધ્યાનું આયોજન કરવામાં આવ્યું છે. આ વિશેષ સાંજનો મુખ્ય ઉદ્દેશ્ય મધ્યપ્રદેશમાં ઉજ્જૈન પાસે આવેલી શિવ જ્ઞાન મોતી લાલ (એસજીએમએલ) આઈ હોસ્પિટલ માટે ભંડોળ એકત્ર કરવાનો અને જનજાગૃતિ ફેલાવવાનો છે.

દ્રષ્ટિહીનતા નિવારણ માટે હોસ્પિટલનું યોગદાન:
ભારતના ગ્રામીણ વિસ્તારોમાં જ્યાં આરોગ્ય સુવિધાઓનો અભાવ છે, ત્યાં જરૂરિયાતમંદ અને વંચિત લોકોને ઉચ્ચ ગુણવત્તાયુક્ત, સસ્તી અને સુલભ નેત્ર ચિકિત્સા સેવાઓ પૂરી પાડવાના વિઝન સાથે આ સંસ્થા કાર્યરત છે. જાન્યુઆરી ૨૦૨૩માં તેની સ્થાપના થઈ ત્યારથી અત્યાર સુધીમાં હોસ્પિટલે નોંધપાત્ર સિદ્ધિઓ હાંસલ કરી છે, જેમાં ૨,૦૦૦થી વધુ આંખના સફળ ઓપરેશનો અને ૨૦,૦૦૦થી વધુ દર્દીઓને પરામર્શ સેવાઓનો સમાવેશ થાય છે. આર્થિક રીતે નબળા દર્દીઓને અહીં રાહતદરે અથવા તદ્દન મફત સારવાર આપવામાં આવે છે.

સંગીત અને મનોરંજનનો સંગમ:
આ ગાલા ઇવેન્ટમાં મહેમાનો માટે સ્વાદિષ્ટ વાનગીઓ અને ડિનરની સાથે હોસ્પિટલની સિદ્ધિઓ અને ભાવિ યોજનાઓ વિશેની પ્રસ્તુતિ રજૂ કરવામાં આવશે. મનોરંજનના ભાગરૂપે પ્રખ્યાત મ્યુઝિકલ ગ્રુપ ‘એસટીઆર એન્ટરટેઈનમેન્ટ’ (STR Entertainment) દ્વારા જીવંત સંગીત પીરસવામાં આવશે. જેમાં સંજય શાહ અને જાણીતા સંગીત નિર્દેશક જિજ્ઞેશ પટેલની આગેવાની હેઠળ સંપૂર્ણ લાઈવ બેન્ડ પરફોર્મ કરશે. સમગ્ર કાર્યક્રમનું સંચાલન જાણીતા આરજે સંજીવ પંડ્યા દ્વારા કરવામાં આવશે.

મલ્ટીમીડિયા અને સામુદાયિક સમર્થન:
આ કાર્યક્રમને આઈટીવી ગોલ્ડ, ટીવી એશિયા, પરીખ વર્લ્ડવાઈડ મીડિયા, ઇન્ડસ ટીવી, રેડિયો જિંદગી, ધ ઇન્ડિયન આઈ, હાય ઇન્ડિયા, ગુજરાત દર્પણ, માના ટીવી, અકિલા ન્યૂઝ, ઈન્ડિયા અબ્રોડ, ધ ઈન્ડિયન પેનોરમા અને ધ ઈન્ડિયા ઓબ્ઝર્વર જેવા અગ્રણી મીડિયા હાઉસ અને દક્ષિણ એશિયાઈ પ્રકાશનોનું સમર્થન પ્રાપ્ત થયું છે.

ભવિષ્યની નેમ અને આયોજકો:
આયોજકોના જણાવ્યા મુજબ, આ ગાલા દ્વારા એકત્ર થયેલી તમામ રકમનો સીધો ઉપયોગ એસજીએમએલ આઈ હોસ્પિટલના વિસ્તરણ, અદ્યતન તબીબી ટેકનોલોજીની ખરીદી અને રેટિના સર્વિસ શરૂ કરવા માટે કરવામાં આવશે. આ કાર્યક્રમને સફળ બનાવવા માટે એક્ઝિક્યુટિવ કમિટીના સભ્યો ડો. તુષાર પટેલ, સ્પર્શિલ પટેલ, સ્મિતા (મિકી) પટેલ, જતીન પટેલ, ઉષા પટેલ, છાયા પટેલ, અર્પિતા પટેલ, ધર્મેશ પટેલ અને સુનીલ પરીખ (એસોસિયેટ ટ્રસ્ટ - ન્યુજર્સી) જહેમત ઉઠાવી રહ્યા છે. દાન આપવા ઈચ્છતા લોકો અને સંસ્થાઓ આઈઆરએસ ૫૦૧(સી)(૩) હેઠળ ટેક્સમાં પણ મુક્તિ મેળવી શકે છે. ટિકિટ અને સ્પોન્સરશિપ માટે ડો. તુષાર પટેલનો સંપર્ક (001) 848-391-0499 નમ્બર પર સાધવા અનુરોધ કરાયો છે.