કેનબેરા તા.૧૩ : ઓસ્ટ્રેલિયાએ તેના 125 વર્ષના સૈન્ય ઈતિહાસમાં પ્રથમવાર એક મહિલાને આર્મી ચીફ તરીકે નિયુક્ત કરીને વિશ્વભરના સૈન્ય જગતમાં નવો માઈલસ્ટોન સ્થાપ્યો છે. વર્તમાન ચીફ ઓફ જોઈન્ટ કેપેબિલિટીઝ લેફ્ટનન્ટ જનરલ સુસાન કોયલ આગામી જુલાઈ મહિનાથી ઓસ્ટ્રેલિયન આર્મીના વડા તરીકેનો કાર્યભાર સંભાળશે અને લેફ્ટનન્ટ જનરલ સિમોન સ્ટુઅર્ટનું સ્થાન લેશે. આ નિમણૂક સાથે કોયલ ઓસ્ટ્રેલિયન ડિફેન્સ ફોર્સની કોઈપણ સર્વિસ બ્રાન્ચનું નેતૃત્વ કરનાર પ્રથમ મહિલા બનશે.

પ્રધાનમંત્રી એન્થોની અલ્બાનીઝે સોમવારે આ ઐતિહાસિક જાહેરાત કરતા કહ્યું કે "જુલાઈથી આપણી પાસે ઓસ્ટ્રેલિયન આર્મીના 125 વર્ષના ઈતિહાસમાં પ્રથમવાર મહિલા આર્મી ચીફ હશે." સંરક્ષણ મંત્રી રિચાર્ડ માર્લ્સે આ ક્ષણને "ઊંડી ઐતિહાસિક ક્ષણ" ગણાવી અને ઉમેર્યું કે "જેમ સુસાને મને કહ્યું, તમે જે જોઈ ન શકો તે બની ન શકો. સુસાનની સિદ્ધિ આજે ADFમાં સેવા આપી રહેલી મહિલાઓ અને ભવિષ્યમાં જોડાવા ઈચ્છતી મહિલાઓ માટે અત્યંત મહત્વપૂર્ણ બનશે."

55 વર્ષીય લેફ્ટનન્ટ જનરલ સુસાન કોયલ 1987માં રિઝર્વિસ્ટ તરીકે ઓસ્ટ્રેલિયન આર્મીમાં જોડાયા હતા. 1992માં રોયલ ઓસ્ટ્રેલિયન કોર્પ્સ ઓફ સિગ્નલ્સમાં કમિશન મેળવ્યા બાદ તેમણે 104મી સિગ્નલ સ્ક્વોડ્રન, 17મી સિગ્નલ રેજિમેન્ટ, ટાસ્ક ગ્રુપ અફઘાનિસ્તાન, 6ઠ્ઠી કોમ્બેટ સપોર્ટ બ્રિગેડ અને જોઈન્ટ ટાસ્ક ફોર્સ 633 સહિત અનેક મહત્વપૂર્ણ કમાન્ડ સંભાળી છે. જાન્યુઆરીથી નવેમ્બર 2020 સુધી તેઓ મધ્ય પૂર્વમાં તમામ ઓસ્ટ્રેલિયન ઓપરેશન્સની જવાબદારી ધરાવતા જોઈન્ટ ટાસ્ક ફોર્સ 633ના કમાન્ડર હતા, જ્યાં તેમણે ઓપરેશન એકોર્ડિયન હેઠળ 1,200 કર્મચારીઓનું નેતૃત્વ કર્યું હતું. આ ટાસ્ક ફોર્સનું નેતૃત્વ કરનાર તેઓ પ્રથમ મહિલા હતા. હાલ તેઓ ચીફ ઓફ જોઈન્ટ કેપેબિલિટીઝ તરીકે સ્પેસ અને સાયબર ડોમેનનું નેતૃત્વ કરી રહ્યા છે.

આ નિમણૂક એવા સમયે થઈ છે જ્યારે ઓસ્ટ્રેલિયન ડિફેન્સ ફોર્સમાં મહિલા અધિકારીઓની સંખ્યા વધારવાના સત પ્રયાસો ચાલી રહ્યા છે. હાલ ADFમાં મહિલાઓની ભાગીદારી લગભગ 21% છે અને વરિષ્ઠ નેતૃત્વની ભૂમિકામાં 18.5% છે. ADFએ 2030 સુધીમાં મહિલાઓની એકંદર ભાગીદારી 25% સુધી લઈ જવાનું લક્ષ્ય નક્કી કર્યું છે. સુસાન કોયલને મેમ્બર ઓફ ધ ઓર્ડર ઓફ ઓસ્ટ્રેલિયા, કોન્સ્પિક્યુઅસ સર્વિસ ક્રોસ અને ડિસ્ટિંગ્વિશ્ડ સર્વિસ મેડલથી સન્માનિત કરવામાં આવ્યા છે. ઓસ્ટ્રેલિયન આર્મીની સ્થાપના 1 માર્ચ 1901ના રોજ થઈ હતી અને આ વર્ષે તે 125 વર્ષ પૂર્ણ કરી રહી છે.