ફ્રેન્કફર્ટ | તા. 13: જો તમે આગામી બે દિવસમાં લુફ્થાન્સા એરલાઇન દ્વારા મુસાફરી કરવાનું આયોજન કરી રહ્યા છો, તો આ સમાચાર તમારા માટે ચેતવણી સમાન છે. પેન્શન યોજના અંગે એરલાઇન મેનેજમેન્ટ અને પાઇલટ યુનિયન વચ્ચેની વાટાઘાટો પડી ભાંગતા, વેરેનિગંગ કોકપિટ (VC) યુનિયને આજથી એટલે કે ૧૩ એપ્રિલથી બે દિવસીય દેશવ્યાપી હડતાળની જાહેરાત કરી છે. આ હડતાળને કારણે જર્મની સહિતના અનેક દેશોમાં ફ્લાઇટ શિડ્યુલ વેરવિખેર થવાની ભીતિ સેવાઈ રહી છે.
કયા કયા પાયલટો જોડાશે અને ક્યાં સુધી ચાલશે હડતાળ?
યુનિયનના જણાવ્યા અનુસાર, લુફ્થાન્સાની મુખ્ય એરલાઇન ઉપરાંત લુફ્થાન્સા કાર્ગો અને લુફ્થાન્સા સિટીલાઇનના પાઇલટ્સ ૧૩ એપ્રિલની મધ્યરાત્રિથી ૧૪ એપ્રિલની રાત્રિ સુધી કામકાજથી અલિપ્ત રહેશે. એટલું જ નહીં, પેટાકંપની 'યુરોવિંગ્સ'ના પાઇલટ્સને પણ આજની હડતાળમાં સામેલ થવા આદેશ અપાયો છે. આ સ્થિતિને પગલે યુરોપ અને અમેરિકા તરફ જતી ફ્લાઇટ્સમાં ભારે વિલંબ અને કેન્સલેશન જોવા મળી શકે છે.
મધ્ય પૂર્વના દેશો માટે રાહતના સમાચાર
જોકે, ભારતીય પ્રવાસીઓ અને ખાડી દેશોમાં મુસાફરી કરનારાઓ માટે થોડી રાહત છે. યુનિયને સ્પષ્ટ કર્યું છે કે મધ્ય પૂર્વના દેશો જેવા કે સાઉદી અરેબિયા, દુબઈ (UAE), કતાર, કુવૈત, ઓમાન અને ઇઝરાયલ તરફ જતી ફ્લાઇટ્સને આ હડતાળમાંથી મુક્તિ આપવામાં આવી છે. આ રૂટ પરની સેવાઓ રાબેતા મુજબ ચાલુ રહેશે.
કેમ સર્જાઈ આ સ્થિતિ?
કોકપિટ યુનિયનના પ્રમુખ એન્ડ્રેસ પિનહેરોએ જણાવ્યું કે, "અમે ઇસ્ટરની રજાઓ દરમિયાન મુસાફરોને તકલીફ ન પડે તે માટે હડતાળ ટાળી હતી, પરંતુ મેનેજમેન્ટ તરફથી હજુ પણ કોઈ ગંભીર ઓફર મળી નથી." બીજી તરફ, લુફ્થાન્સા મેનેજમેન્ટે પાયલટોની પેન્શન યોજના બમણી કરવાની માંગને 'વાહિયાત અને અપ્રાપ્ય' ગણાવી છે.
મુસાફરો માટે સૂચના
એરલાઇને મુસાફરોને વિનંતી કરી છે કે એરપોર્ટ પર જતા પહેલા તેમની ફ્લાઇટનું સ્ટેટસ ઓનલાઇન ચેક કરી લેવું. જે મુસાફરોની ફ્લાઇટ રદ થઈ છે તેમને રિફંડ અથવા વૈકલ્પિક વ્યવસ્થા માટે એરલાઇનનો સંપર્ક કરવા જણાવાયું છે. આગામી ૪૮ કલાક લુફ્થાન્સાના નેટવર્ક માટે અત્યંત પડકારજનક સાબિત થવાના છે.