કોલકાતા:પશ્ચિમ બંગાળ વિધાનસભા ચૂંટણી 2026 પહેલા રાજકીય તાપમાન વધી ગયું છે. ભારતીય જનતા પાર્ટીએ રાજ્યમાં પોતાની સંપૂર્ણ તાકાત લગાવી દીધી છે. આ ક્રમમાં કેન્દ્રીય ગૃહમંત્રી અમિતભાઈ શાહે બીરભૂમ અને પશ્ચિમ વર્ધમાન જિલ્લામાં જનસભાઓ સંબોધીને મુખ્યમંત્રી મમતા બેનર્જી સરકાર પર આકરા પ્રહારો કર્યા હતા.

રેલીને સંબોધતા અમિતભાઈ શાહે આરોપ લગાવ્યો કે મમતા બેનર્જી સરકારે રાજ્યમાં ઘૂસણખોરીને પ્રોત્સાહન આપ્યું છે. તેમણે કહ્યું કે સરહદ સુરક્ષા માટે વાડ બનાવવા BSFને 600 એકર જમીનની જરૂર હતી, પરંતુ રાજ્ય સરકારે જમીન આપવાનો ઇનકાર કર્યો. શાહે આરોપ લગાવ્યો કે ઘૂસણખોરોને સુરક્ષિત રાખીને મત બેંક તરીકે ઉપયોગ કરવામાં આવી રહ્યો છે. તેમણે વચન આપ્યું કે "5 મે, 2026ના રોજ ભાજપ સરકાર બનાવશે તે પછી, ઘૂસણખોરોને ઓળખીને દેશમાંથી હાંકી કાઢવામાં આવશે."

શાહે તાજેતરના મમતા બેનર્જીના ભાષણનો ઉલ્લેખ કરતા કહ્યું કે, "તાજેતરમાં જ મમતા દીદીએ ભાષણમાં અહીં બહુમતી સમુદાયને ધમકી આપી હતી કે જો ટીએમસી નહીં રહે, તો બહુમતી સમુદાયનું અસ્તિત્વ ખતમ થઈ જશે. હે દીદી, આપણે સદીઓથી અહીં રહીએ છીએ, તમે અમને ડરાવનારા કોણ છો?" તેમણે આગળ ઉમેર્યું કે મમતા શાસનમાં મુર્શિદાબાદમાં રમખાણો થયા, રામ નવમી પર હુમલા થયા અને સરસ્વતી પૂજામાં વિક્ષેપ પડ્યો છે.

ભાજપ કાર્યકરો સામે હિંસાના મુદ્દા પર અમિત શાહે કડક વલણ દાખવતા કહ્યું કે 2021ની ચૂંટણી પછી બીરભૂમમાં ઘણા કાર્યકરોએ હિંસાનો સામનો કરવો પડ્યો, અને 100થી વધુ લોકોને ભાગી જવું પડ્યું. તેમણે ચેતવણી આપી કે ભાજપ સરકાર બન્યા પછી "હિંસા કરનારાઓની અંડરવર્લ્ડમાંથી પણ શોધ કરવામાં આવશે અને જેલમાં મોકલવામાં આવશે." 

ટીએમસી સરકાર પર કાયદો અને વ્યવસ્થાને લઈને સવાલ ઉઠાવતા શાહે આરોપ લગાવ્યો કે "મા, માટી, માનુષ"ના નારાને માફિયા અને સિન્ડિકેટ શાસનમાં પરિવર્તિત કરવામાં આવ્યો છે. તેમણે કહ્યું કે ભાજપ રવિન્દ્રનાથ ટાગોરની કલ્પના મુજબ "સોનાર બાંગ્લા"નું નિર્માણ કરવા માટે કામ કરશે અને રાજ્યમાં વિકાસ, સુરક્ષા અને સુશાસન સુનિશ્ચિત કરશે.

અમિતભાઈ શાહના સંબોધનનો મુખ્ય સંદેશ એ રહ્યો કે પશ્ચિમ બંગાળની રાજનીતિ હવે સુરક્ષા, કાયદો-વ્યવસ્થા અને સુશાસન જેવા મુદ્દાઓની આસપાસ કેન્દ્રિત છે. ગેરકાયદેસર ઘૂસણખોરી, રાજકીય હિંસા અને કાયદો-વ્યવસ્થાને મુખ્ય ચૂંટણી એજન્ડા બનાવવામાં આવી રહ્યા છે.