નવી દિલ્હી: વડાપ્રધાન નરેન્દ્ર મોદીએ આજે ફરી એકવાર ખેડૂત કલ્યાણ અને વિકાસના એજન્ડા પર ભાર મૂકતા જણાવ્યું છે કે, ખેડૂતોનું કલ્યાણ એ ભાજપની આગેવાની હેઠળની NDA સરકારની સર્વોચ્ચ પ્રાથમિકતા છે. 'મેરા બૂથ સબસે મજબૂત' અભિયાન અંતર્ગત નમો એપ દ્વારા તમિલનાડુના પક્ષના કાર્યકરો સાથે સીધો સંવાદ કરતા પીએમ મોદીએ દક્ષિણ ભારતમાં બદલાતા રાજકીય વાતાવરણનો ઉલ્લેખ કર્યો હતો.
તમિલનાડુમાં પરિવર્તનની આશા
વડાપ્રધાને કાર્યકરોને સંબોધતા કહ્યું કે, તમિલનાડુના લોકોમાં હવે એક નવું વાતાવરણ અને નવી આશા જોવા મળી રહી છે. રાજ્યના લોકો પરિવર્તનની અપેક્ષા સાથે ભાજપ અને NDA તરફ આશાભરી નજરે જોઈ રહ્યા છે. પીએમ મોદીએ દાવો કર્યો હતો કે કેન્દ્ર સરકારની નીતિઓ અને વિકાસના કામોને કારણે રાજ્યમાં ભાજપનો પાયો વધુ મજબૂત બની રહ્યો છે.
વિકાસના પ્રોજેક્ટ્સની હારમાળા
તેમણે વધુમાં ઉમેર્યું કે, કેન્દ્રમાં NDA સરકાર આવ્યા બાદ તમિલનાડુમાં રેલ્વે, હાઈવે, બંદરો અને એરપોર્ટ જેવા પાયાના માળખાકીય સુવિધાઓના અનેક પ્રોજેક્ટ્સ શરૂ કરવામાં આવ્યા છે. આ પ્રોજેક્ટ્સ રાજ્યના આર્થિક વિકાસને નવી ગતિ આપી રહ્યા છે અને તેનું કામ અત્યંત ઝડપથી આગળ વધી રહ્યું છે.
મધ્યમ વર્ગ અને આરોગ્ય પર ભાર
વડાપ્રધાને સંવાદ દરમિયાન મધ્યમ વર્ગના સપનાઓનો પણ ઉલ્લેખ કર્યો હતો. તેમણે કહ્યું કે સરકાર મધ્યમ વર્ગની જરૂરિયાતો પ્રત્યે સંવેદનશીલ છે અને તેમના જીવનને સરળ બનાવવા માટે મોટા પગલાં લેવામાં આવ્યા છે. ખાસ કરીને આરોગ્યસંભાળ ક્ષેત્રમાં થયેલા નોંધપાત્ર પરિવર્તનોને કારણે સામાન્ય નાગરિકોને ગુણવત્તાયુક્ત સુવિધાઓ મળી રહી છે, જે આધુનિક ભારતની ઓળખ બની રહી છે.
પીએમ મોદીના આ સંવાદથી તમિલનાડુના કાર્યકરોમાં ઉત્સાહનો સંચાર થયો છે અને આગામી ચૂંટણી લક્ષી રણનીતિ માટે એક મજબૂત પાયો તૈયાર થયો છે.