નવી દિલ્હી: પશ્ચિમ એશિયામાં ચાલી રહેલા યુદ્ધ અને તણાવપૂર્ણ સ્થિતિ વચ્ચે ભારત સરકાર માટે એક ખૂબ જ રાહત આપનારા સમાચાર સામે આવ્યા છે. વિશ્વના સૌથી વ્યૂહાત્મક જળમાર્ગ ગણાતા 'હોર્મુઝ સ્ટ્રેટ'માં ફસાયેલા 15 ભારતીય જહાજો અને તેમાં સવાર સેંકડો નાવિકોને સુરક્ષિત પરત લાવવા માટે ભારતનું બંદર અને વિદેશ મંત્રાલય યુદ્ધના ધોરણે કામ કરી રહ્યું છે. અમેરિકા અને ઈરાન વચ્ચે જાહેર થયેલા 14 દિવસના યુદ્ધવિરામનો લાભ લઈને ભારત પોતાના હિતોને સુરક્ષિત કરી રહ્યું છે.
'જગ વિક્રમ'ની સફળ એન્ટ્રી: ઈંધણની તંગી ટળશે
ભારત માટે સૌથી મોટી સફળતા એ છે કે 'જગ વિક્રમ' નામનું ભારતીય LPG જહાજ સફળતાપૂર્વક હોર્મુઝ સામુદ્રધુની પાર કરી ચૂક્યું છે. 20,400 મેટ્રિક ટન રસોઈ ગેસ (LPG) લઈને આ જહાજ આવતીકાલે એટલે કે 14 એપ્રિલે ગુજરાતના કંડલા બંદરે પહોંચશે. ભારતની 90 ટકા ગેસ આયાત ગલ્ફ દેશોમાંથી થતી હોવાથી, આ જહાજનું સુરક્ષિત આગમન દેશમાં ઈંધણના પુરવઠાને જાળવી રાખવા માટે અત્યંત મહત્વનું છે.
નાવિકોની સુરક્ષા પ્રથમ પ્રાથમિકતા
બંદર અને શિપિંગ મંત્રાલયના અધિક સચિવ મુકેશ મંગલે જણાવ્યું હતું કે, છેલ્લા 24 કલાકમાં કોઈપણ ભારતીય જહાજ સાથે અનિચ્છનીય ઘટના બની નથી. અત્યાર સુધીમાં સરકારે 2,177 થી વધુ ભારતીય નાવિકોને સુરક્ષિત રીતે વતન પરત લાવવામાં સફળતા મેળવી છે, જેમાં છેલ્લા 24 કલાકમાં જ 93 નાવિકોનો સમાવેશ થાય છે. ભારત સરકાર આ ક્ષેત્રમાં રહેલા દરેક ભારતીય નાગરિકની સુરક્ષા માટે વિદેશ મંત્રાલય અને સ્થાનિક સત્તાવાળાઓ સાથે સતત સંપર્કમાં છે.
રાજદ્વારી પ્રયાસો રંગ લાવ્યા
અમેરિકા અને ઈરાન વચ્ચેના 14 દિવસના યુદ્ધવિરામ બાદ 'જગ વિક્રમ' એ સામુદ્રધુની પાર કરનાર પ્રથમ ભારતીય જહાજ છે. આ ભારતની મજબૂત વિદેશ નીતિ અને વ્યૂહાત્મક પહોંચનો પુરાવો છે. વિદેશ મંત્રાલયના જણાવ્યા અનુસાર, હોર્મુઝ સ્ટ્રેટમાં હજુ પણ 15 ભારતીય માલિકીના જહાજો છે, જેમને વહેલી તકે બહાર લાવવા માટેના પ્રયાસો તેજ કરી દેવામાં આવ્યા છે.
હાલમાં ભારતભરના તમામ બંદરો પર કામગીરી સામાન્ય છે અને ક્યાંય પણ જહાજોનો જમાવડો કે કામકાજમાં અડચણ જોવા મળી નથી. સરકારની આ તત્પરતાને કારણે દેશની અર્થવ્યવસ્થા અને સુરક્ષા બંને મજબૂત દેખાઈ રહી છે.