બેંગલુરુ: ટેક સિટી બેંગલુરુમાં અત્યારે ઘર શોધવું એ લોઢાના ચણા ચાવવા સમાન બની ગયું છે. તાજેતરમાં એક મહિલાનો વીડિયો સોશિયલ મીડિયા પર જોરદાર વાયરલ થઈ રહ્યો છે, જેમાં તેણીએ શહેરમાં ભાડાના મકાન માટેની જીવલેણ સ્પર્ધાનો પોતાનો કડવો અનુભવ શેર કર્યો છે. આ મહિલાએ દાવો કર્યો છે કે તેણે એક મહિનાની સખત શોધ બાદ એક પરફેક્ટ 1BHK ફ્લેટ શોધી કાઢ્યો હતો, પરંતુ માત્ર એક કલાકનો વિચાર કરવાનો સમય માંગતા જ તેણીએ તે તક ગુમાવી દીધી.
"બ્રેકઅપ કરતા પણ વધુ દર્દનાક"
ઇન્સ્ટાગ્રામ પર @namma_rants હેન્ડલ દ્વારા શેર કરવામાં આવેલા વીડિયોમાં મહિલા પોતાની વ્યથા ઠાલવતા કહે છે કે, "તમારા જીવનમાંથી કોઈ પ્રિય વ્યક્તિને ગુમાવવા કરતા પણ વધુ દુઃખદાયક અનુભવ એ સંભવિત ઘર ગુમાવવાનો છે." તેણીએ જણાવ્યું કે તે લાંબા સમયથી ગેરીડાચરપાલ્યા વિસ્તારમાં સંપૂર્ણ સજ્જ (Fully Furnished) ઘર શોધી રહી હતી. ઘણી મુશ્કેલી બાદ તેને એક ઘર ગમ્યું અને તે મકાનમાલિકની તમામ શરતો સાથે સંમત પણ હતી.
માત્ર દોઢ કલાકમાં ખેલ ખતમ!
મહિલાએ અંતિમ નિર્ણય લેવા અને ડિપોઝિટ ભરતા પહેલા મકાનમાલિક (અન્ના) પાસે માત્ર એક થી દોઢ કલાકનો સમય માંગ્યો હતો. જોકે, જ્યારે તેણે દોઢ કલાક પછી ફોન કરીને કહ્યું કે તે પૈસા ભરવા તૈયાર છે, ત્યારે મકાનમાલિકનો જવાબ સાંભળીને તે સ્તબ્ધ થઈ ગઈ. મકાનમાલિકે ટૂંકમાં જ કહી દીધું કે, "ઘર ગયું, બીજા કોઈએ તરત જ ડિપોઝિટ ભરી દીધી છે."
સોશિયલ મીડિયા પર પ્રતિક્રિયાઓનો ધોધ
આ વીડિયો વાયરલ થતા જ બેંગલુરુમાં રહેતા સેંકડો લોકોએ પોતાની સાથે બનેલી આવી જ ઘટનાઓ શેર કરી છે. એક યુઝરે લખ્યું, "બેંગલુરુમાં તમે આંખના પલકારે ફ્લેટ ગુમાવી શકો છો, અહીં સ્પર્ધા ખૂબ જ ખતરનાક છે." બીજા એક યુઝરે રમૂજમાં ટિપ્પણી કરી કે, "આ શહેરમાં ઘર શોધવા માટે તમારે વિચારવાનો સમય નહીં, પણ સીધું ચેકબુક લઈને જ ફરવું પડે છે."
હાલમાં આ મહિલા ફરીથી નવા ઘરની શોધમાં છે, પરંતુ તેનો આ વીડિયો બેંગલુરુના અસ્તવ્યસ્ત અને અત્યંત મોંઘા બનેલા રિયલ એસ્ટેટ માર્કેટનો અરીસો બનીને સામે આવ્યો છે.