વેટિકન સિટી: વિશ્વના ૧.૪ અબજ કેથોલિકોના સર્વોચ્ચ ધર્મગુરુ પોપ લીઓ XIV અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચેનો વિવાદ હવે ચરમસીમાએ પહોંચ્યો છે. રવિવારે ટ્રમ્પે પોપની આકરી ટીકા કરતા તેમને "ગુનામાં નબળા" ગણાવ્યા હતા, જેના જવાબમાં આજે પોપે સ્પષ્ટ શબ્દોમાં કહી દીધું છે કે તેઓ કોઈના દબાણ સામે ઝૂકશે નહીં અને ગોસ્પેલનો શાંતિનો સંદેશ ફેલાવતા રહેશે.
ટ્રમ્પના સનસનાટીભર્યા આક્ષેપો
રાષ્ટ્રપતિ ટ્રમ્પે 'ટ્રુથ સોશિયલ' પર પોસ્ટ કરીને દાવો કર્યો હતો કે જો તેઓ વ્હાઇટ હાઉસમાં ન હોત તો અમેરિકામાં જન્મેલા પ્રથમ પોપ (લીઓ XIV) ની પસંદગી જ ન થઈ હોત. ટ્રમ્પે લખ્યું, "ચર્ચે તેમને ત્યાં એટલે મૂક્યા કારણ કે તેઓ માનતા હતા કે મારા (ટ્રમ્પ) જેવી શક્તિશાળી વ્યક્તિ સાથે વ્યવહાર કરવા માટે એક અમેરિકન પોપ જ શ્રેષ્ઠ રહેશે." ટ્રમ્પે પોપ પર 'રેડિકલ ડાબેરીઓ'ને સાથ આપવાનો અને વેનેઝુએલા તેમજ ઈરાન પરની અમેરિકી નીતિઓની ટીકા કરવાનો આક્ષેપ પણ લગાવ્યો છે.
પોપનો શાંત અને મક્કમ જવાબ
આફ્રિકાના પ્રવાસે જતી વખતે વિમાનમાં પત્રકારો સાથે વાત કરતા પોપ લીઓએ કહ્યું કે, "મને ટ્રમ્પ વહીવટીતંત્રનો કે કોઈ ધમકીનો ડર નથી. હું અહીં રાજકારણ કરવા નહીં પણ શાંતિ અને માનવતાનો સંદેશ આપવા આવ્યો છું." ઉલ્લેખનીય છે કે, પોપે તાજેતરમાં જ ઈરાન સામેના યુદ્ધને 'અનૈતિક' ગણાવ્યું હતું અને ઈરાની સંસ્કૃતિને નષ્ટ કરવાની ટ્રમ્પની ધમકીને 'અસ્વીકાર્ય' કહી હતી.
ધર્મ અને રાજનીતિનો ટકરાવ
શિકાગોમાં જન્મેલા ૭૦ વર્ષીય પોપ લીઓ (રોબર્ટ પ્રિવોસ્ટ) ની પસંદગી ગયા વર્ષે થઈ હતી. ટ્રમ્પ સાથેના તેમના સંબંધો શરૂઆતથી જ તણાવપૂર્ણ રહ્યા છે. ખાસ કરીને જ્યારે ટ્રમ્પે પોતાને આર્ટિફિશિયલ ઇન્ટેલિજન્સ (AI) દ્વારા બનાવેલા ફોટામાં પોપ તરીકે દર્શાવ્યા અને ઈસુ જેવી મુદ્રામાં ફોટા પોસ્ટ કર્યા, ત્યારે વેટિકન અને વિશ્વભરના પાદરીઓમાં ભારે રોષ જોવા મળ્યો હતો. શનિવારે જ વોશિંગ્ટનના આર્કબિશપે ઈરાન સાથેના યુદ્ધની નિંદા કરતા તેને 'ખ્રિસ્તી મૂલ્યોની વિરુદ્ધ' ગણાવ્યું હતું.
કેથોલિક મતદારો પર અસર
અમેરિકામાં કેથોલિક મતદારો હંમેશા નિર્ણાયક ભૂમિકા ભજવે છે. છેલ્લી ચૂંટણીમાં ૫૫ ટકા કેથોલિકોએ ટ્રમ્પને મત આપ્યા હતા, પરંતુ હવે જે પ્રકારે ટ્રમ્પ સીધા પોપ પર હુમલો કરી રહ્યા છે, તે જોતા ધાર્મિક સમુદાયમાં તિરાડ પડવાની શક્યતા છે. અમેરિકી બિશપ્સના પ્રમુખે પણ ટ્રમ્પના શબ્દો પર નિરાશા વ્યક્ત કરતા કહ્યું છે કે પોપ કોઈ રાજકારણી નથી પણ ઈશ્વરના પ્રતિનિધિ છે.
આ વિવાદ હવે માત્ર બે નેતાઓ વચ્ચેનો રહ્યો નથી, પરંતુ તે ઉર્જા, યુદ્ધ અને ધાર્મિક આસ્થાના એક મોટા વૈશ્વિક સંઘર્ષમાં ફેરવાઈ ગયો છે.