લંડન : ગઈકાલે મોડી રાત્રે બ્રિટનના આકાશમાં એક અદભૂત અને થોડી ડરામણી કહી શકાય તેવી ખગોળીય ઘટના જોવા મળી હતી. રાત્રે અંદાજે ૧૨:૩૦ વાગ્યે આકાશમાં એક વિશાળ લીલો અગ્નિગોળો (Fireball) અત્યંત ઝડપે પસાર થતો દેખાયો હતો. આ નજારો જોઈને અનેક લોકો ચોંકી ગયા હતા અને સોશિયલ મીડિયા પર તેના વીડિયો વાયરલ થયા હતા. ઘણા લોકોએ તો તેને રખડતા ફટાકડા કે કોઈ માનવસર્જિત વસ્તુ સમજી લીધી હતી.
લોકોમાં કુતૂહલ અને આશ્ચર્ય
યુકેના ડર્બીશાયર, નોર્થ યોર્કશાયર અને નોર્થમ્બરલેન્ડ જેવા વિસ્તારોમાં ડોરબેલ કેમેરા અને સીસીટીવીમાં આ દ્રશ્યો કેદ થયા છે. એક પ્રત્યક્ષદર્શીએ જણાવ્યું કે, "મારું આખું બાથરૂમ લીલા પ્રકાશથી ચમકી ઉઠ્યું હતું, મને લાગ્યું કે કદાચ મને ભ્રમ થઈ રહ્યો છે." અન્ય એક દર્શકે ફેસબુક પર લખ્યું કે, "આ ખૂબ જ તેજસ્વી લીલા રંગનો હતો અને એટલો નજીક લાગતો હતો કે મને તે ફટાકડો જ લાગ્યો હતો."
વૈજ્ઞાનિક સમજૂતી: તે 'બોલાઈડ' હતી
વિજ્ઞાનની ભાષામાં આ તેજસ્વી ઉલ્કાને 'બોલાઈડ' (Bolide) કહેવામાં આવે છે. જ્યારે અવકાશમાંથી કોઈ ખડક પૃથ્વીના વાતાવરણમાં પ્રવેશે છે, ત્યારે હવામાં ઘર્ષણને કારણે તે ગરમ થાય છે અને સળગી ઉઠે છે. નાસા (NASA) ના જણાવ્યા અનુસાર, ઘર્ષણને કારણે ઉલ્કાની સામે 'બો શોક' (Bow Shock) સર્જાય છે, જે ગેસને ગરમ કરીને તેજસ્વી પ્રકાશ ઉત્પન્ન કરે છે. આ ઉલ્કા પૃથ્વીની સપાટી પર અથડાય તે પહેલા જ વાતાવરણમાં બળીને ખાખ થઈ ગઈ હોય તેમ જણાય છે.
અવકાશ અને પૃથ્વી વચ્ચેનો સંબંધ
રહસ્યમયી લીલા રંગ વિશે નિષ્ણાતોનું કહેવું છે કે ઉલ્કાના બંધારણમાં રહેલા નિકલ અથવા મેગ્નેશિયમ જેવા તત્વો જ્યારે વાતાવરણમાં સળગે છે, ત્યારે આવો લીલો રંગ જોવા મળે છે. નોંધનીય છે કે હાલમાં નાસાનું આર્ટેમિસ II મિશન પણ ચર્ચામાં છે, ત્યારે લોકો આ ઘટનાને મજાકમાં "ચંદ્ર પરથી પૃથ્વી તરફ ફેંકાયેલા પથ્થર" તરીકે પણ જોઈ રહ્યા છે. જોકે, આવી હજારો ઉલ્કાઓ દરરોજ પૃથ્વીના વાતાવરણમાં પ્રવેશે છે, પરંતુ મોટાભાગની દરિયામાં કે નિર્જન વિસ્તારોમાં પડતી હોવાથી નજરે પડતી નથી.