મુંબઈ : મુંબઈની લાઈફલાઈન ગણાતી લોકલ ટ્રેનમાં મુસાફરી કરતા લાખો લોકો માટે મોટા  અને આનંદના સમાચાર છે. મુસાફરોની સુરક્ષાને સર્વોપરી ગણીને રેલવે તંત્ર દ્વારા પ્રથમ વખત ઓટોમેટિક દરવાજા ધરાવતી 'નોન-એસી' (સામાન્ય) લોકલ ટ્રેન રજૂ કરવામાં આવી છે. સોમવારે આ અત્યાધુનિક EMU રેક મુંબઈના કુર્લા કાર શેડ ખાતે આવી પહોંચ્યું છે, જે શહેરના ઉપનગરીય રેલવે નેટવર્કના આધુનિકીકરણની દિશામાં એક મોટું સીમાચિહ્ન માનવામાં આવે છે.
દુર્ઘટનાઓ અટકાવવા મહત્વનું પગલું
મુંબઈમાં પીક અવર્સ દરમિયાન ટ્રેનના દરવાજે લટકીને મુસાફરી કરવી એ મજબૂરી અને જીવનું જોખમ બંને છે. મુમ્બ્રા જેવી ગંભીર ટ્રેન દુર્ઘટનાઓ બાદ, જેમાં ખુલ્લા દરવાજા મુખ્ય કારણ હતા, રેલવેએ આ સિસ્ટમ વિકસાવી છે. હવે ટ્રેન ચાલતા પહેલા દરવાજા આપમેળે બંધ થઈ જશે, જેનાથી મુસાફરો ચાલુ ટ્રેને પડી જવાની કે બહાર લટકવાની ઘટનાઓ પર અંકુશ આવશે.
ખાસિયતો જે મુસાફરીને બનાવશે આરામદાયક
•    વેસ્ટિબ્યુલ ડિઝાઇન: આ ટ્રેનમાં એક કોચમાંથી બીજા કોચમાં જવા માટે વેસ્ટિબ્યુલ (જોડાયેલા ડબ્બા)ની સુવિધા છે, જે મેટ્રો ટ્રેન જેવો અનુભવ આપશે.
•    હવાની અવરજવર: એસી ટ્રેન ન હોવાથી, મુસાફરોની સુવિધા માટે સ્લાઇડિંગ પેનવાળી ખુલ્લી બારીઓ રાખવામાં આવી છે જેથી કુદરતી હવા મળી રહે.
•    મહિલા સુરક્ષા: ટ્રેનના બંને છેડે મહિલા કોચની વ્યવસ્થા રાખવામાં આવી છે.
ભારતીય રેલવેમાં પ્રથમ પ્રયોગ
આશ્ચર્યની વાત એ છે કે, ઓટોમેટિક દરવાજાવાળી નોન-એસી ટ્રેનનો પ્રયોગ માત્ર મુંબઈમાં જ નહીં પરંતુ સમગ્ર ભારતીય રેલવેમાં પ્રથમવાર થઈ રહ્યો છે. આ ૧૨ કોચની ટ્રેનનું નિર્માણ ચેન્નાઈની પ્રખ્યાત 'ઇન્ટિગ્રલ કોચ ફેક્ટરી' (ICF) દ્વારા કરવામાં આવ્યું છે. રેલવે અધિકારીઓના જણાવ્યા મુજબ, ભવિષ્યમાં તમામ નવી લોકલ ટ્રેનોમાં આ 'બંધ દરવાજા' સિસ્ટમ ફરજિયાત કરવામાં આવશે.
ટ્રાયલ બાદ જનતા માટે ખુલશે
ટ્રેન અત્યારે મુંબઈ આવી પહોંચી છે, પરંતુ મુસાફરો માટે ખુલ્લી મુકતા પહેલા તેના કડક પરીક્ષણો કરવામાં આવશે. જેમાં હાઈ-સ્પીડ સેફ્ટી ટેસ્ટ અને મુસાફરોના વજન સાથેના લોડ ટ્રાયલનો સમાવેશ થાય છે. આ તમામ પ્રક્રિયા પૂર્ણ થયા બાદ મુંબઈગરાને એક સુરક્ષિત અને આધુનિક લોકલ ટ્રેનની ભેટ મળશે.