અમદાવાદ: ઉનાળાની કાળઝાળ ગરમીની વચ્ચે જો કોઈ બાબત લોકોમાં ખુશી લાવતી હોય, તો તે છે 'કેરી'. ભારતભરમાં કેરીની અનેક જાતો જોવા મળે છે, જે દરેક પોતાની સુગંધ, આકાર અને સ્વાદ માટે પ્રખ્યાત છે. દક્ષિણ ભારતથી લઈને ઉત્તર ભારત સુધી કેરીના અનેક રૂપ જોવા મળે છે, જેમાંથી કેટલીક મુખ્ય જાતો વિશે અહીં વિગતે માહિતી આપવામાં આવી છે.
હાપુસ (આલ્ફોન્સો) અને રત્નાગિરી કેરી
મહારાષ્ટ્રની હાપુસ કેરી વિશ્વભરમાં નિકાસ થતી સૌથી મોંઘી અને લોકપ્રિય કેરી છે. ફાઇબરલેસ એટલે કે રેસા વગરની આ કેરી તેના કેસરી રંગ અને અદભૂત સુગંધ માટે જાણીતી છે. તેવી જ રીતે રત્નાગિરી, દેવગિરી અને કોંકણ પટ્ટામાં થતી રત્નાગિરી કેરી પણ ખૂબ જ મીઠી અને ઉચ્ચ ગુણવત્તાવાળી હોય છે. તેના પર રહેલો આછો લાલાશ પડતો રંગ તેની ખાસ ઓળખ છે.
તોતાપુરી અને બંગીનાપલ્લી
દક્ષિણ ભારતમાં ખાસ કરીને આંધ્રપ્રદેશ, તેલંગાણા અને કર્ણાટકમાં 'તોતાપુરી' કેરી વિપુલ પ્રમાણમાં થાય છે. તેનો પોપટ જેવો અણીદાર આકાર અને લીલો-પીળો રંગ તેને અલગ પાડે છે. જોકે આ કેરી બહુ મીઠી હોતી નથી, તેથી અથાણાં કે સલાડ માટે તે શ્રેષ્ઠ પસંદગી છે. બીજી તરફ, 'બંગીનાપલ્લી' કેરી આંધ્રના કુર્નૂલ જિલ્લાની ખાસિયત છે, જે કદમાં મોટી, અંડાકાર અને પાતળી છાલવાળી હોય છે.
ચૌસા: ઉત્તર ભારતનો ગર્વ
ઉત્તર ભારત અને બિહારમાં 'ચૌસા' કેરીનું આધિપત્ય છે. ૧૬મી સદીમાં શેર શાહ સૂરી દ્વારા આ જાતની શોધ કરવામાં આવી હતી. આ કેરી તેજસ્વી પીળા રંગની અને અત્યંત રસદાર તથા મીઠી હોય છે. જો તમે ગળપણના શોખીન હોવ તો ચૌસા કેરી તમારા માટે જ છે.
સિંધુરા: શેક અને પલ્પ માટે બેસ્ટ
જો તમને થોડી ખાટી-મીઠી કેરી ગમતી હોય, તો સિંધુરા કેરી આદર્શ છે. બહારથી લાલ અને અંદરથી તેજસ્વી પીળો રંગ ધરાવતી આ કેરીની સુગંધ લાંબા સમય સુધી જીભ પર ટકી રહે છે. ખાસ કરીને મેંગો શેક કે પલ્પ બનાવવા માટે આ કેરીનો વધુ ઉપયોગ થાય છે.
ભારતમાં કેરી માત્ર એક ફળ નથી, પણ એક લાગણી છે. ઉનાળાના આ ચાર મહિના લોકો કેરીના વિવિધ સ્વાદ માણીને આખા વર્ષની પ્રતીક્ષાને સાર્થક કરે છે.