રોમ (વેટિકન સિટી): ઇટાલીના રોમ સ્થિત વેટિકન સિટીની ૫૦૦ વર્ષથી વધુ જૂની વેટિકન એપોસ્ટોલિક લાઇબ્રેરીમાં ઇતિહાસમાં પહેલીવાર મુસ્લિમ સંશોધકોને નમાઝ પઢવા માટે એક વિશેષ રૂમ આપવામાં આવ્યો છે. લાઇબ્રેરીના વાઇસ પ્રિફેક્ટ ફાધર ડોન જિયાકોમો કાર્ડિનાલીએ એક ઇટાલિયન અખબારને આપેલા ઇન્ટરવ્યુમાં આ વાતની પુષ્ટિ કરી છે. આ નિર્ણયને લઈને ઓનલાઈન અનેક ચર્ચાઓ અને વિવાદો શરૂ થઈ ગયા છે.

સોશિયલ મીડિયા પ્લેટફોર્મ 'એક્સ' પર શેર કરવામાં આવેલા એક વીડિયો અને 'શિયા વેવ્સ' તેમજ અન્ય આંતરરાષ્ટ્રીય મીડિયા રિપોર્ટ્સ અનુસાર, વેટિકન સિટીની પ્રતિષ્ઠિત વેટિકન એપોસ્ટોલિક લાઇબ્રેરીમાં પ્રથમ વખત મુસ્લિમ સંશોધકો માટે નમાઝ પઢવા એક ખાસ રૂમની ફાળવણી કરવામાં આવી છે.

ઓક્ટોબર ૨૦૨૫ માં ઇટાલીના જાણીતા અખબાર 'લા રિપબ્લિકા' માં પ્રકાશિત થયેલા એક ઇન્ટરવ્યુમાં, લાઇબ્રેરીના વાઇસ-પ્રિફેક્ટ ફાધર ડોન જિયાકોમો કાર્ડિનાલીએ આ અંગે ખુલાસો કર્યો હતો. તેમણે જણાવ્યું હતું કે, "અન્ય ધર્મોના સંશોધકો પણ અહીં અભ્યાસ માટે આવે છે. કેટલાક મુસ્લિમ વિદ્વાનોએ અમને નમાઝ પઢવા માટે જાજમ (કાર્પેટ) સાથેના એક રૂમની વિનંતી કરી હતી, તેથી અમે તેમને તે પૂરો પાડ્યો છે."

આ રૂમ કોઈ જાહેર મસ્જિદ નથી, પરંતુ માત્ર સંશોધન માટે આવતા મુસ્લિમ સ્કોલર્સની સુવિધા માટે ફાળવવામાં આવેલી એક નાનકડી જગ્યા છે. ફાધર કાર્ડિનાલીએ વધુમાં ઉમેર્યું હતું કે વેટિકન લાઇબ્રેરી એક વૈશ્વિક લાઇબ્રેરી છે. તેમાં અકલ્પનીય રીતે પ્રાચીન કુરાનની પ્રતો તેમજ અરબી, યહૂદી, ઇથિયોપિયન અને અનન્ય ચાઇનીઝ સંગ્રહો પણ રહેલા છે.

વર્ષ ૧૪૭૫ માં સત્તાવાર રીતે સ્થાપિત આ એપોસ્ટોલિક લાઇબ્રેરી વિશ્વની સૌથી જૂની લાઇબ્રેરીઓમાંની એક છે, જેમાં લાખો મુદ્રિત પુસ્તકો અને હજારો ઐતિહાસિક હસ્તપ્રતો સચવાયેલી છે.

જોકે, વેટિકન દ્વારા લેવાયેલા આ નિર્ણયે સોશિયલ મીડિયા અને કેથોલિક સમુદાયમાં ભારે ચર્ચા જગાવી છે. રૂઢિચુસ્ત વિચારધારા ધરાવતા કેટલાક લોકોએ આ પગલાની ટીકા કરી છે. બીજી તરફ, કેટલાક લોકોએ આ નિર્ણયને આદર, સહિષ્ણુતા અને આંતરધર્મીય સંવાદની દિશામાં એક સકારાત્મક અને આવકારદાયક પગલા તરીકે બિરદાવ્યો છે. *