નવી દિલ્હી:  વિશ્વ આખું જ્યારે યુદ્ધ અને આર્થિક પ્રતિબંધોના ડરથી ધ્રૂજી રહ્યું છે, ત્યારે ભારતીય અર્થતંત્રે એક નવો જ ઈતિહાસ રચી દીધો છે. નાણાકીય વર્ષ ૨૦૨૬ માટે જાહેર થયેલા સત્તાવાર આંકડા મુજબ, ભારતનો વાસ્તવિક જીડીપી  ગ્રોથ રેટ અપેક્ષા કરતાં ઘણો વધારે એટલે કે ૭.૭% નોંધાયો છે. સૌથી આશ્ચર્યજનક બાબત એ છે કે જાન્યુઆરી-માર્ચના ચોથા ક્વાર્ટરમાં જ ગ્રોથ રેટ ૭.૮% રહ્યો છે. અમેરિકામાં ડોનાલ્ડ ટ્રમ્પની ટેરિફ નીતિઓ અને યુએસ-ઈરાન યુદ્ધને લીધે વધેલા ક્રૂડના ભાવો પણ ભારતીય અર્થતંત્રના વિજય રથને રોકી શક્યા નથી.

આ ભવ્ય તેજી પાછળ ભારતનું મેન્યુફેક્ચરિંગ, હોસ્પિટાલિટી અને સર્વિસ સેક્ટર મુખ્ય એન્જિન સાબિત થયા છે. આંકડાકીય વિગતો મુજબ, સેકન્ડરી સેક્ટરમાં ૮.૮% અને ટર્શિયરી (સેવા) સેક્ટરમાં ૯.૩% નો મજબૂત ઉછાળો આવ્યો છે, જ્યારે કૃષિ ક્ષેત્રે પણ ૩.૨% નો સુધારો નોંધાવ્યો છે. દેશનો નોમિનલ જીડીપી વધીને ₹૩૪૬.૩૬ લાખ કરોડ પર પહોંચી ગયો છે, જે દર્શાવે છે કે સામાન્ય ભારતીયોની ખરીદશક્તિ અને બજારમાં રોકાણનું પ્રમાણ બંને ૭.૫% થી વધુની ઝડપે વધી રહ્યા છે.

નાણા મંત્રાલયના જણાવ્યા અનુસાર, આ અસાધારણ આંકડાઓ ૨૭ ફેબ્રુઆરી, ૨૦૨૬ ના રોજ લાગુ કરાયેલી નવી શ્રેણી (આધાર વર્ષ ૨૦૨૨-૨૩) પર આધારિત છે. વૈશ્વિક આર્થિક મંદીના માહોલમાં ચોથા ક્વાર્ટરનો ૭.૮% નો ગ્રોથ રેટ એ વાતની સાબિતી છે કે આગામી સમયમાં દેશના ઔદ્યોગિક ઉત્પાદન અને રોજગારીમાં બમ્પર વધારો થવાનો છે. ભારત હવે માત્ર ટકી રહ્યું નથી, પરંતુ આખી દુનિયાના આર્થિક વિકાસનું નેતૃત્વ કરી રહ્યું છે.