કોલકાતા : પશ્ચિમ બંગાળના રાજકારણમાં અત્યારે ભારે ઉથલપાથલ ચાલી રહી છે. રાજ્યની વિધાનસભા ચૂંટણીમાં મળેલી કારમી હાર બાદ હવે તૃણમૂલ કોંગ્રેસ (TMC) ની મુશ્કેલીઓનો અંત આવવાનું નામ નથી લઈ રહ્યું. પાર્ટીના વડા મમતા બેનર્જી હવે દિલ્હીની સક્રિય રાજનીતિમાં પ્રવેશવા અને લોકસભામાં સ્થાન મેળવવા માટે પ્રયત્નશીલ છે. આ હેતુને સિદ્ધ કરવા માટે તેમણે બહેરામપુરના સાંસદ અને ભૂતપૂર્વ ક્રિકેટર યુસુફ પઠાણ પાસે તેમની બેઠક ખાલી કરાવવાની માંગ કરી હતી, પરંતુ પઠાણે સ્પષ્ટ શબ્દોમાં રાજીનામું આપવાની ના પાડી દીધી છે.

શું છે મમતા બેનર્જીની રણનીતિ?

મમતા બેનર્જી લોકસભામાં પહોંચવા માટે બહેરામપુરને એક સુરક્ષિત બેઠક ગણી રહી છે, કારણ કે ત્યાં મુસ્લિમ વસ્તી 50 ટકાથી વધુ છે. આ બેઠક પરથી અગાઉ કોંગ્રેસના દિગ્ગજ નેતા અધીર રંજન ચૌધરીનું વર્ષો સુધી વર્ચસ્વ રહ્યું હતું, જેમને યુસુફ પઠાણે છેલ્લી લોકસભા ચૂંટણીમાં પરાજય આપ્યો હતો. મમતા બેનર્જીને આશા હતી કે જો તેઓ અહીંથી ચૂંટણી લડે તો તેમનો દિલ્હી પ્રવેશ સુગમ બનશે. જોકે, યુસુફ પઠાણ દ્વારા રાજીનામું આપવાનો ઇનકાર કરવામાં આવતા મમતાની આ યોજના હાલ પૂરતી ઠપ્પ થઈ ગઈ છે.

ટીએમસીમાં ભંગાણ: ફિરહાદ હકીમનું રાજીનામું

પાર્ટી માટે મુશ્કેલીઓનો દોર માત્ર લોકસભા સીટ પૂરતો સીમિત નથી. ટીએમસીના કદાવર નેતા અને કોલકાતાના મેયર ફિરહાદ હકીમે શુક્રવારે પોતાના પદ પરથી રાજીનામું આપીને રાજકીય ભૂકંપ સર્જી દીધો છે. હકીમે જણાવ્યું હતું કે તેઓ પોતાની ફરજો યોગ્ય રીતે નિભાવવામાં અસમર્થ છે, તેથી જ તેમણે મમતા બેનર્જીની સંમતિ બાદ આ નિર્ણય લીધો છે. નોંધપાત્ર છે કે ફિરહાદ હકીમ મમતા બેનર્જીના સૌથી નજીકના સાથીદાર ગણાતા હતા, તેમનું આ રાજીનામું પાર્ટીની નબળી પડતી પકડ તરફ નિર્દેશ કરે છે.

પાર્ટીમાં અરાજકતાનો માહોલ

માત્ર નેતાઓના રાજીનામા જ નહીં, પરંતુ સૂત્રોના જણાવ્યા અનુસાર, ટીએમસીના અંદાજે 58 ધારાસભ્યો પણ બળવાના મૂડમાં છે અને તેઓએ નવા વિપક્ષી નેતાની પસંદગી પણ કરી લીધી છે. એવી પણ ચર્ચાઓ છે કે લોકસભાના 20 જેટલા સાંસદો ટૂંક સમયમાં પાર્ટી છોડવાની તૈયારી કરી રહ્યા છે. એક તરફ મમતા બેનર્જી સત્તા જાળવી રાખવા મથામણ કરી રહી છે, તો બીજી તરફ પોતાના જ પક્ષના નેતાઓનો સાથ છૂટી રહ્યો છે. હવે જોવાનું એ રહેશે કે મમતા બેનર્જી આ આંતરિક કકળાટમાંથી બહાર આવવા માટે કેવા રાજકીય દાવ રમે છે.