રાજસ્થાનના કોટા જિલ્લાના બુઢાદીત ગામે આવેલા 1100 વર્ષ જૂના ઐતિહાસિક ચંદ્રેસલ મઠમાં ખૂની ખેલ ખેલાયો છે. મઠના મહંત દેવાનંદ મહારાજની અજાણ્યા શખ્સો દ્વારા નિર્મમ હત્યા કરી દેવામાં આવતા સમગ્ર સંત સમાજ અને વિસ્તારમાં શોકનું મોજું ફરી વળ્યું છે.

ગુરુવારે સવારે મહંત દેવાનંદ મહારાજ પોતાના રૂમમાંથી બહાર ન નીકળતા સેવકોએ તપાસ કરતા તેઓ લોહીલુહાણ હાલતમાં મૃત અવસ્થામાં મળી આવ્યા હતા. મહંતના શરીર પર તીક્ષ્ણ હથિયારના અનેક ઘા જોવા મળ્યા હતા. ઘટનાની જાણ થતા જ પોલીસનો કાફલો અને ઉચ્ચ અધિકારીઓ ઘટનાસ્થળે દોડી આવ્યા હતા.

ચંદ્રેસલ મઠ લગભગ 1100 વર્ષ જૂનો અને ઐતિહાસિક મહત્વ ધરાવતો મઠ છે. મહંત દેવાનંદ મહારાજ છેલ્લા ઘણા વર્ષોથી આ મઠની સેવા-પૂજા સંભાળતા હતા અને વિસ્તારમાં ખૂબ જ આદરણીય સંત તરીકે જાણીતા હતા.

ઘટનાની ગંભીરતાને જોતા પોલીસે તાત્કાલિક FSL ટીમ અને ડોગ સ્કવોડને બોલાવી પુરાવા એકત્ર કર્યા છે. પોલીસે હત્યાનો ગુનો નોંધી આરોપીઓને પકડવા માટે અલગ અલગ ટીમો બનાવી છે. પ્રાથમિક તપાસમાં જમીન વિવાદ કે લૂંટના ઈરાદે હત્યા કરવામાં આવી હોવાની આશંકા સેવાઈ રહી છે. મઠમાંથી કોઈ કિંમતી સામાન ગાયબ છે કે કેમ તે દિશામાં પણ તપાસ ચાલી રહી છે.

મહંતની હત્યાના સમાચાર વાયુવેગે પ્રસરતા જ મોટી સંખ્યામાં સંતો, મહંતો અને સ્થાનિક લોકો મઠ ખાતે એકઠા થઈ ગયા હતા. સંત સમાજે આ ઘટનાને વખોડી કાઢી હત્યારાઓને તાત્કાલિક ઝડપી કડકમાં કડક સજા કરવાની માંગ કરી છે.

પોલીસ અધિકારીઓએ જણાવ્યું કે આરોપીઓને ઝડપી લેવા માટે તમામ પ્રયાસો કરવામાં આવી રહ્યા છે અને ટૂંક સમયમાં જ આ કેસનો ભેદ ઉકેલી દેવામાં આવશે.