ગુવાહાટી તા.૬ : આસામ સરકારે રાજ્યના લાખો સરકારી કર્મચારીઓ અને પેન્શનરોને મોટી ભેટ આપી છે. રાજ્ય સરકારે મોંઘવારી ભથ્થા એટલે કે DA માં 2% નો વધારો કરવાની જાહેરાત કરી છે. આ વધારો જુલાઈ 2026 થી લાગુ થશે, જેના કારણે કર્મચારીઓના પગારમાં સીધો વધારો જોવા મળશે.

આસામ સરકારના નિર્ણય મુજબ હાલ રાજ્ય સરકારના કર્મચારીઓને મળતું 55% મોંઘવારી ભથ્થું હવે વધીને 57% થઈ ગયું છે. એટલે કે કર્મચારીઓના મૂળ પગાર પર હવે 2% વધુ DA ચૂકવવામાં આવશે. આ નિર્ણયથી રાજ્યના આશરે 4 લાખથી વધુ સરકારી કર્મચારીઓ અને 2 લાખથી વધુ પેન્શનરોને સીધો ફાયદો થશે

સરકાર દ્વારા જાહેર કરાયા મુજબ આ વધારો 1 જુલાઈ 2026 થી અમલમાં આવશે. એટલે કે જુલાઈ મહિનાના પગાર સાથે કર્મચારીઓને વધેલા DA નો લાભ મળશે. આ સાથે જ પેન્શનરોને પણ મોંઘવારી રાહત DR માં 2% નો વધારો મળશે.

આ નિર્ણયથી રાજ્ય સરકારની તિજોરી પર વાર્ષિક કરોડો રૂપિયાનું વધારાનું ભારણ આવશે. તેમ છતાં વધતી જતી મોંઘવારીને ધ્યાનમાં રાખીને કર્મચારીઓને રાહત આપવા માટે સરકારે આ નિર્ણય લીધો છે.

આસામ સરકારના પ્રવક્તાએ જણાવ્યું કે રાજ્યના કર્મચારીઓ સરકારનો એક મહત્વપૂર્ણ ભાગ છે અને તેમના હિતોનું ધ્યાન રાખવું એ સરકારની પ્રાથમિકતા છે. તહેવારોની સિઝન પહેલા લેવાયેલા આ નિર્ણયથી કર્મચારીઓ અને પેન્શનરોમાં ખુશીની લહેર જોવા મળી રહી છે.