નવી દિલ્હી : શું તમે ક્યારેય વિચાર્યું છે કે ખરીદી કરવા જવા માટે કે મૂવી જોવા માટે તમે કોઈને ભાડેથી સાથી (Companion) રાખી શકો? જાપાન જેવા દેશોમાં આ કન્સેપ્ટ ખૂબ જાણીતો છે, પરંતુ હવે આ અનોખો અને ચર્ચિત ટ્રેન્ડ ભારતના પાટનગર દિલ્હી સુધી પહોંચી ગયો છે. દિલ્હીના જાણીતા ઇન્સ્ટાગ્રામ સર્જક ઇશા ભલ્લાએ 'Kopartner.in' નામની વેબસાઇટનો ઉપયોગ કરીને એક દિવસ માટે 'બોયફ્રેન્ડ' ભાડે લીધો અને તેનો અનુભવ શેર કરતો વીડિયો વાયરલ થતાં સમગ્ર સોશિયલ મીડિયા પર ચર્ચાઓનું બજાર ગરમ થઈ ગયું છે.

શું છે આ સેવા અને તેનો ઉદ્દેશ્ય?

ઇશા ભલ્લાએ તેમના વીડિયોમાં જણાવ્યું કે, આ પ્લેટફોર્મ મુખ્યત્વે 'કમ્પેનિયનશીપ' એટલે કે સાથ આપવાની સેવા પૂરી પાડે છે. જોકે આ વેબસાઇટ ક્યાંય પણ 'બોયફ્રેન્ડ ભાડે' તેવો ઉલ્લેખ નથી કરતી, પરંતુ જરૂરિયાત મુજબ લોકો તેનો ઉપયોગ સાથી તરીકે કરે છે. આ સેવાઓ માત્ર શોપિંગ કે ફરવા પૂરતી સીમિત નથી, પરંતુ તેમાં વૃદ્ધોની સંભાળ, પાર્ટીમાં સાથે જવું, તબીબી સહાય અને મુસાફરીમાં સાથ જેવી બાબતોનો પણ સમાવેશ થાય છે. આ સેવાઓની કિંમત પ્રતિ કલાક ₹1,000 થી શરૂ કરીને ₹2,500 સુધીની હોય છે.

ખરીદીમાં મદદથી લઈને મૂડ સારો કરવા સુધીની કામગીરી

વીડિયોમાં જોવા મળ્યું કે ઇશાએ જે સાથીને બુક કર્યો હતો, તેણે માત્ર તેની શોપિંગ બેગ્સ જ ન ઉપાડી, પરંતુ ખરીદીમાં તેને મદદ પણ કરી. એટલું જ નહીં, ઇશા જ્યારે તેના ભૂતપૂર્વ બોયફ્રેન્ડને લઈને પરેશાન હતી, ત્યારે આ 'ભાડાના સાથી'એ તેને જોક્સ સંભળાવીને હસાવવાનો પ્રયાસ પણ કર્યો. જોકે, ઇશાએ રમૂજમાં એમ પણ કહ્યું કે, તે વ્યક્તિની ચોઈસ (ખરીદી કરવાની પસંદગી) ભયંકર હતી, પણ છતાંય એક સાથી તરીકે તેનો અનુભવ રસપ્રદ રહ્યો હતો.

સોશિયલ મીડિયા પર લોકોની મિશ્ર પ્રતિક્રિયાઓ

આ વીડિયો વાયરલ થતાં જ લોકો બે ભાગમાં વહેંચાઈ ગયા છે. કેટલાક યુઝર્સ આ વિચારની મજાક ઉડાવી રહ્યા છે, તો કેટલાક ભારતમાં આવી સેવાઓ અસ્તિત્વમાં છે તે જાણીને સ્તબ્ધ છે. કોમેન્ટ સેક્શનમાં એક યુઝરે રમૂજમાં પૂછ્યું, "હું આ નોકરી માટે કેવી રીતે અરજી કરું?", તો કેટલાક ટીકાકારોએ લખ્યું કે, "આજના સમયમાં બેરોજગારી કેટલી હદે વધી ગઈ છે કે લોકોએ આ પ્રકારની સેવાઓ શરૂ કરવી પડી છે." કેટલાક લોકોએ તો આ સેવાને ફેક ગણાવીને સાવચેત રહેવાની સલાહ પણ આપી છે.

ભારતના મોટા શહેરોમાં ઉપલબ્ધ છે આ સુવિધા

Kopartner.in જેવી વેબસાઇટ્સ માત્ર દિલ્હી જ નહીં, પરંતુ મુંબઈ, અમદાવાદ, બેંગલુરુ, પુણે અને ચેન્નાઈ જેવા મુખ્ય શહેરોમાં પણ પોતાની સેવાઓ આપે છે. મૂવીઝ જોવા માટે ₹2,000 પ્રતિ કલાક અને શોપિંગ માટે ₹1,200 પ્રતિ કલાક જેવી ફી સાથે આ પ્લેટફોર્મ આધુનિક યુગના એકલવાયા લોકોને આકર્ષી રહ્યું છે. હવે જોવાનું એ છે કે ભારતની પરંપરાગત માનસિકતામાં આ 'ભાડાના સાથી'નો ટ્રેન્ડ કેટલો સફળ થાય છે.