ચેન્નાઈ : તમિલનાડુના રાજકારણમાં અત્યારે મોટા પાયે ઉથલપાથલ જોવા મળી રહી છે. ભાજપના પૂર્વ પ્રદેશ અધ્યક્ષ કે. અન્નામલાઈએ ભાજપમાંથી રાજીનામું આપીને એક નવી રાજકીય મુહિમ 'વી ધ લીડર્સ' (We The Leaders) શરૂ કરતા જ રાજ્ય ભાજપમાં રાજીનામાનું પૂર આવ્યું છે. અન્નામલાઈના સમર્થનમાં રાજ્યના ઉપાધ્યક્ષ કારુ નાગરાજન અને સચિવ સુમતી વેંકટેશ સહિતના અનેક દિગ્ગજ નેતાઓએ પક્ષ છોડતા ભાજપની છાવણીમાં ચિંતાનું મોજું ફરી વળ્યું છે.

'મારી અપીલ છે, ભાજપ છોડશો નહીં': નૈનર નાગેન્દ્રન

આ ગંભીર પરિસ્થિતિને જોતા, ભાજપના નેતા નૈનર નાગેન્દ્રને તાત્કાલિક પ્રેસ કોન્ફરન્સ યોજીને કાર્યકરોને પક્ષમાં જ રહેવા વિનંતી કરી છે. તેમણે વિશ્વાસ વ્યક્ત કરતા કહ્યું, “ભાજપ કાર્યકરોને મારી અપીલ છે કે કોઈ પણ અન્ય પક્ષ કે ચળવળમાં ન જાઓ. ભાજપ વિશ્વની સૌથી મોટી પાર્ટી છે અને આપણી પાસે વિશ્વના નંબર વન નેતા વડાપ્રધાન નરેન્દ્ર મોદી છે. પક્ષના પાયા વિચારધારા પર ટકેલા છે, જે કોઈ એક વ્યક્તિના આવવા કે જવા સાથે બદલાતા નથી.”

અન્નામલાઈનું નવું સાહસ અને લોકોનો જબરદસ્ત પ્રતિસાદ

ભૂતપૂર્વ IPS અધિકારી અન્નામલાઈએ ભાજપમાંથી અલગ થયા બાદ "સામાન્ય માણસની રાજનીતિ" ને પ્રોત્સાહન આપવાની જાહેરાત કરી છે. તેમના આ નવા રાજકીય અભિયાનને લોકોનો અકલ્પનીય પ્રતિસાદ મળી રહ્યો છે. લોન્ચિંગના ગણતરીના કલાકોમાં જ આઠ લાખથી વધુ લોકો આ પહેલ સાથે જોડાયા છે, જે સાબિત કરે છે કે અન્નામલાઈનું વ્યક્તિત્વ તમિલનાડુના યુવાનો અને વ્યવસાયિકોમાં કેટલું પ્રભાવશાળી છે. અન્નામલાઈનું લક્ષ્ય તમિલનાડુમાં વંશીય રાજકારણનો અંત લાવીને ટેક્નોક્રેટ્સ અને સામાન્ય નાગરિકોને શાસનમાં ભાગીદાર બનાવવાનું છે.

શું ભાજપના ટેકેદારો પર અસર પડશે?

જોકે, ભાજપનું મોવડળ અત્યારે એવો દાવો કરી રહ્યું છે કે અન્નામલાઈના જવાથી પક્ષને કોઈ ફટકો પડશે નહીં. નૈનર નાગેન્દ્રનના જણાવ્યા અનુસાર, ભાજપમાં ઘણા નેતાઓ ભૂતકાળમાં પણ આવ્યા અને ગયા છે, પરંતુ પક્ષ તેની મજબૂત વિચારધારાને કારણે અડગ રહ્યો છે. ભાજપનું માનવું છે કે અન્નામલાઈને રાજકીય પક્ષ શરૂ કરવાનો પૂરો અધિકાર છે, પરંતુ પક્ષની રણનીતિ અને સમર્થન આધાર પર તેની કોઈ નકારાત્મક અસર નહીં પડે.

રાજકીય ગણિત બદલાશે?

અન્નામલાઈનું આ નવું પગલું તમિલનાડુમાં ભાજપ માટે એક મોટો પડકાર તો છે જ, સાથે જ રાજ્યના રાજકીય સમીકરણો પણ બદલી શકે છે. એક તરફ ભાજપની મજબૂત કેડર છે, તો બીજી તરફ અન્નામલાઈનું નવું અને આકર્ષક પ્લેટફોર્મ. આ લડાઈ હવે માત્ર પક્ષની નથી, પણ વિચારધારા અને નેતૃત્વની છે, જેના પરિણામો આવનારી ચૂંટણીઓમાં સ્પષ્ટપણે જોવા મળશે.