ચેન્નાઈ : તમિલનાડુના રાજકીય મંચ પર આજે ગરમાવો જોવા મળ્યો હતો, જ્યારે ડીએમકેના વડા એમ.કે. સ્ટાલિને એક અત્યંત મહત્વપૂર્ણ અને ચોંકાવનારો દાવો કર્યો હતો. ચેન્નાઈમાં આયોજિત એક કાર્યક્રમમાં AIADMK માંથી આવેલા નવા કાર્યકરોનું સ્વાગત કરતા સ્ટાલિને સ્પષ્ટ કર્યું હતું કે, રાજ્યમાં વર્તમાન સરકારને ગઠબંધન પક્ષો દ્વારા જે ટેકો આપવામાં આવ્યો હતો, તે પાછળનો મુખ્ય ઉદ્દેશ્ય રાજકીય સત્તા મેળવવાનો નહીં, પરંતુ તમિલનાડુમાં 'રાષ્ટ્રપતિ શાસન' લાદવામાં આવતું અટકાવવાનો હતો.

ગઠબંધન પક્ષોની મજબૂરી અને સ્ટાલિનનો નિર્ણય

સ્ટાલિને જણાવ્યું કે, જ્યારે ગઠબંધન પક્ષો (જેમ કે કોંગ્રેસ, CPI, CPI(M), VCK અને IUML) એ તેમને TVK ને ટેકો આપવાની યોજના વિશે જણાવ્યું, ત્યારે તેમણે કોઈને રોક્યા નહોતા. તેમના મતે, જો તે સમયે આ નિર્ણય ન લેવાયો હોત તો રાજ્યમાં રાષ્ટ્રપતિ શાસન લાદવાની સંભાવના હતી, જેનાથી ભાજપ માટે તમિલનાડુમાં પગપેસારો કરવાનો માર્ગ મોકળો થઈ શક્યો હોત. સ્ટાલિને કહ્યું કે, "તે સમયે મેં તેમને કહ્યું હતું કે આ તમારી પસંદગી અને લોકશાહી અધિકાર છે, હું તમને રોકીશ નહીં. આ સરકાર આજે મારા જ ગઠબંધન પક્ષોના ટેકે ટકી છે."

રાજકીય લડાઈનો નવો અધ્યાય

23 એપ્રિલની વિધાનસભા ચૂંટણીમાં જોસેફ વિજયની પાર્ટી TVK એ 108 બેઠકો જીતી હતી, પરંતુ બહુમતી (118 બેઠકો) મેળવવામાં તે 10 બેઠકો પાછળ રહી ગઈ હતી. આ કપરા સમયે કોંગ્રેસ અને અન્ય ડાબેરી પક્ષોએ TVK ને ટેકો આપી સરકાર બનાવવામાં મહત્વની ભૂમિકા ભજવી હતી. હવે સ્ટાલિને પોતાના કાર્યકરો સમક્ષ એક નવી પ્રતિજ્ઞા લીધી છે કે, જે સરકાર તેમના જ ગઠબંધનના ટેકે અસ્તિત્વમાં છે, હવે તેને સત્તા પરથી હટાવવા માટે ડીએમકે કમર કસશે.

'હારથી હતાશ નથી, વિપક્ષ તરીકે સેવા ચાલુ રાખીશું'

સ્ટાલિને સ્વીકાર્યું કે સફળતા અને નિષ્ફળતા એ રાજકારણના બે સિક્કા છે. તેમણે કાર્યકરોને આશ્વાસન આપતા કહ્યું કે, "આપણે વિજયના ઉન્માદમાં માથું નથી ગુમાવતા કે હારથી હતાશ નથી થતા. ભલે આજે આપણે સત્તામાં નથી, પરંતુ વિપક્ષમાં બેસીને તમિલનાડુની જનતાની સેવા કરવાનું કાર્ય આપણે વધુ મજબૂતીથી ચાલુ રાખીશું."

સ્ટાલિનનું આ નિવેદન દર્શાવે છે કે તમિલનાડુના રાજકારણમાં હવે સત્તાધારી TVK અને મુખ્ય વિપક્ષ ડીએમકે વચ્ચે સંઘર્ષ વધુ તીવ્ર બનશે. શું સ્ટાલિનની આ પ્રતિજ્ઞા તમિલનાડુમાં આવનારા સમયમાં ફરી કોઈ રાજકીય ભૂકંપ લાવશે? તે જોવું અત્યંત રસપ્રદ રહેશે.