નવી દિલ્હી : ભારત અને નેપાળ વચ્ચેના સંબંધો આજે એક નવા અને આધુનિક વળાંક પર છે. વિદેશ મંત્રી ડૉ. એસ. જયશંકરે દિલ્હીમાં તેમના નેપાળી સમકક્ષ શિશિર ખાનલ સાથેની વિસ્તૃત વાતચીત દરમિયાન બંને દેશો વચ્ચેની મજબૂત પૂરકતા પર ભાર મૂક્યો હતો. ડૉ. જયશંકરે સ્પષ્ટ કર્યું હતું કે, ભારત અને નેપાળ માત્ર પડોશી નથી, પરંતુ એક અનોખી સંસ્કૃતિ અને પરંપરાના ભાગીદાર છે, જે સુરક્ષાથી લઈને વિકાસ સુધી દરેક ક્ષેત્રમાં ખભેખભા મિલાવીને ચાલી રહ્યા છે.

નવા ક્ષેત્રોમાં વિકાસની અપાર તકો

આ મુલાકાત માત્ર પરંપરાગત મુદ્દાઓ પૂરતી સીમિત રહી નથી. બંને નેતાઓએ હવે વેપાર, ઉર્જા અને જળવિદ્યુત પ્રોજેક્ટ્સની સાથે સાથે AI (આર્ટિફિશિયલ ઇન્ટેલિજન્સ), ઇન્ફોર્મેશન ટેકનોલોજી અને સ્ટાર્ટઅપ્સ જેવા અત્યાધુનિક ક્ષેત્રોમાં સહયોગ વધારવા અંગે સહમતી સાધી છે. ડૉ. જયશંકરે જણાવ્યું હતું કે, નેપાળના ઉદ્દેશ્યો અને ભારતની પડોશી પહેલ એકબીજાના પૂરક છે, જે બંને દેશોની પ્રગતિમાં મહત્વનો ફાળો આપશે.

ડિજિટલ ક્રાંતિ અને માનવીય સહયોગ

આ બેઠકની સૌથી મોટી વિશેષતા એ રહી કે બંને મંત્રીઓએ સરહદ પાર નાણાકીય વ્યવહારને સરળ બનાવવા માટે NPCI ઇન્ડિયા અને નેશનલ પેમેન્ટ્સ ઇન્ટરફેસ નેપાળ વચ્ચે જોડાણ શરૂ કર્યું છે. આ ઉપરાંત, કાઠમંડુ યુનિવર્સિટી સાથે 'ભાષિની' પ્લેટફોર્મના માધ્યમથી 'વોઇસ ફર્સ્ટ' ભાષા અનુવાદ માટે થયેલ સમજૂતી કરાર (MoU) ડિજિટલ ક્ષેત્રે બંને દેશોના જોડાણને એક ઉચ્ચ સ્તરે લઈ જશે. ડૉ. જયશંકરે ભૂકંપ બાદના પુનર્નિર્માણ કાર્યક્રમ હેઠળ ૭૨ આરોગ્ય સુવિધાઓ અને ૧૨ સાંસ્કૃતિક વારસાના પ્રોજેક્ટ્સનું વર્ચ્યુઅલી વિતરણ કરીને માનવીય સંબંધોની પણ પુષ્ટિ કરી હતી.

નેપાળની ભારત પ્રત્યે કૃતજ્ઞતા

નેપાળના વિદેશ મંત્રી શિશિર ખાનાલે ભારતને પોતાનો સૌથી મહત્વપૂર્ણ ભાગીદાર ગણાવતા જણાવ્યું હતું કે, નેપાળે ભારતને સર્વોચ્ચ પ્રાથમિકતા આપી છે. પશ્ચિમ એશિયાના સંકટ સમયે ભારત દ્વારા ઇંધણ અને ખાતરના પુરવઠામાં મળેલી મદદ માટે તેમણે ભારતનો વિશેષ આભાર માન્યો હતો. ત્રણ દિવસની ભારત મુલાકાતે આવેલા શ્રી ખાનલની આ યાત્રા બંને દેશો વચ્ચેના વિશ્વાસના પાયાને વધુ મજબૂત બનાવનારી સાબિત થઈ રહી છે.

આ મુલાકાત એ વાતનું સ્પષ્ટ સંકેત છે કે બંને દેશો હવે જૂના અને પરંપરાગત સંબંધોને બદલીને ભવિષ્યની ટેકનોલોજી અને આર્થિક સમૃદ્ધિની ભાગીદારી તરફ આગળ વધી રહ્યા છે.