ભુવનેશ્વર:  ઓડિશાના કંધમાલ જિલ્લાના બાલીગુડામાં આઈટીડીએ (ITDA) ખાતે ફરજ બજાવતા સહાયક કાર્યકારી ઇજનેર બૈકુંઠનાથ બેહેરા વિરુદ્ધ વિજિલન્સ વિભાગે અપ્રમાણસર સંપત્તિના મામલામાં શુક્રવારે એક સાથે ૯ સ્થળોએ દરોડા પાડીને કરોડો રૂપિયાની બેનામી મિલકતોનો પર્દાફાશ કર્યો છે. ભુવનેશ્વરની સ્પેશિયલ વિજિલન્સ કોર્ટના સર્ચ વોરંટના આધારે વિજિલન્સ વિભાગને મળેલી અપ્રમાણસર આવકની ચોક્કસ ફરિયાદના પગલે આ મોટી કાર્યવાહી હાથ ધરવામાં આવી હતી. આ દરોડામાં ભુવનેશ્વર, બારીપાડા, જાજપુર અને બાલીગુડા સ્થિત સરકારી નિવાસો અને સંબંધીઓના ઘરોને આવરી લેવાયા હતા, જેમાં બે એડિશનલ એસપી, પાંચ ડીએસપી અને છ ઇન્સ્પેક્ટરો સહિતના મોટા કાફલાએ ઓપરેશન પાર પાડ્યું હતું.
વિજિલન્સ વિભાગની પ્રાથમિક તપાસમાં એન્જિનિયર બૈકુંઠનાથ અને તેમના પરિવારના નામે પ્રાઇમ લોકેશન પર પાંચ વૈભવી ઇમારતો મળી આવી છે. જેમાં ભુવનેશ્વરના નીલાદ્રી વિહારમાં ચાર માળની ઇમારત, શૈલશ્રી વિહારમાં ત્રણ માળનું મકાન અને કાનન વિહાર તેમજ ચંદ્રશેખરપુરમાં આલીશાન બંગલાઓનો સમાવેશ થાય છે. આ સિવાય તપાસ દરમિયાન ઓડિશાના અલગ-અલગ વિસ્તારોમાંથી ૧૩ કિંમતી પ્લોટના દસ્તાવેજો પણ મળી આવ્યા છે, જેમાંથી સાત પ્લોટ ભુવનેશ્વરના સૌથી મોંઘા વિસ્તારોમાં આવેલા છે. દરોડા દરમિયાન અધિકારીઓએ ઘટનાસ્થળેથી રૂ.૨,૬૬,૪૦૦ ની રોકડ રકમ પણ જપ્ત કરી છે.
આ આખી કાર્યવાહીનો સૌથી ચોંકાવનારો અને મુખ્ય ખુલાસો એન્જિનિયરની પત્નીના નામે રહેલા બેંક લોકર્સમાંથી થયો છે. વિજિલન્સ સોર્સના સત્તાવાર અહેવાલો મુજબ, ભુવનેશ્વરના ચંદ્રશેખરપુર સ્થિત એક્સિસ બેંક અને યુનિયન બેંક ઓફ ઇન્ડિયાની શાખાઓમાં રાખવામાં આવેલા બે લોકર્સ ખોલતા તેમાંથી અંદાજે રૂ.૨ કરોડના રોકડા રૂપિયાના બંડલો મળી આવ્યા હતા. નોટોની ગણતરી કરવા માટે અધિકારીઓએ બેંકની મશીનોનો ઉપયોગ કરવો પડ્યો હતો. આ સાથે જ સોનાના કિંમતી દાગીનાનું વજન અને મૂલ્યાંકન કરવાની પ્રક્રિયા પણ હાલ ચાલુ છે.
ભૂતકાળમાં ઓડિશામાં સરકારી અધિકારીઓ પર થયેલી ભ્રષ્ટાચાર વિરોધી કાર્યવાહીઓની સરખામણીએ આ દરોડાને તાજેતરના વર્ષોનું સૌથી મોટું ઓપરેશન માનવામાં આવી રહ્યું છે. હાલની સ્થિતિએ વિજિલન્સની ટેકનિકલ શાખા તમામ જમીન અને ઇમારતોનું સત્તાવાર સરકારી માપન અને નાણાકીય રોકાણોની વિગતવાર ચકાસણી કરી રહી છે. હવે પછીના પગલાં તરીકે, તમામ બેંક ખાતાઓ, પોસ્ટ ઓફિસ ડિપોઝિટ અને જપ્ત કરાયેલા મિલકત દસ્તાવેજોનો આખરી મૂલ્યાંકન અહેવાલ તૈયાર થયા બાદ આરોપી ઇજનેર વિરુદ્ધ અપ્રમાણસર સંપત્તિ રાખવાના ગુના હેઠળ કડક કાનૂની કાર્યવાહી કરીને જેલ ભેગા કરવામાં આવશે.