પટણા:  બિહારના પાટનગર પટણાની પ્રખ્યાત 'ખાન ગ્લોબલ સ્ટડીઝ ઇન્સ્ટિટ્યૂટ'માં થયેલી તોડફોડ અને ફાયરિંગની ઘટનાએ હવે મોટું કાનૂની અને રાજકીય સ્વરૂપ ધારણ કરી લીધું છે. ચર્ચાસ્પદ શિક્ષક ખાન સર (ફૈઝલ ખાન) પટણા સિવિલ કોર્ટમાં શરણાગતિ સ્વીકારશે તેવી અફવાઓ પર વિરામ મુકતા તેમના વકીલ એડવોકેટ અરવિંદ કુમારે સ્પષ્ટ કર્યું છે કે ખાન સર કોઈપણ સંજોગોમાં સરેન્ડર કરવાના નથી. વકીલે દાવો કર્યો છે કે કદમકુઆન પોલીસ સ્ટેશનમાં નોંધાયેલી હત્યાના પ્રયાસ અને આર્મ્સ એક્ટની FIR એ ખાન સરની લોકપ્રિયતાને નુકસાન પહોંચાડવા અને તેમને ખોટી રીતે ફસાવવા માટે રચાયેલું એક સુઆયોજિત કાવતરું છે.

બચાવ પક્ષના વકીલના જણાવ્યા અનુસાર, ગત ૨ જૂનના રોજ ખાન સરના સ્ટાફ દ્વારા એક હરીફ કોચિંગ સંસ્થાના સંચાલક સામે કાયદેસરની ફરિયાદ દાખલ કરવામાં આવી હતી. આ જ અદાવતનો બદલો લેવા માટે હરીફ જૂથના દબાણ હેઠળ પોલીસ FIRના ખુલાસા નિવેદનમાં ખાન સરનું નામ બળજબરીથી ઉમેરવામાં આવ્યું છે. ઇન્સ્ટિટ્યૂટ પર થયેલા હુમલાના વાયરલ વીડિયો અંગે સ્પષ્ટતા આપતા વકીલે જણાવ્યું કે મંગળવારે રાત્રે જ્યારે ૧૫ થી ૨૦ અજાણ્યા ગુંડાઓએ કેમ્પસ પર પથ્થરમારો અને તોડફોડ શરૂ કરી, ત્યારે ત્યાં તૈનાત સિક્યોરિટી ગાર્ડ્સે માત્ર આત્મરક્ષણ  માટે હવામાં ફાયરિંગ કર્યું હતું, જેનાથી કોઈને ઈજા થઈ નથી.

બીજી તરફ, પટણાના વરિષ્ઠ પોલીસ અધિક્ષક કાર્તિકેય શર્માએ ખાન સર વિરૂદ્ધ ગુનો નોંધાયો હોવાની સત્તાવાર પુષ્ટિ કરી છે અને જણાવ્યું છે કે પોલીસ ટૂંક સમયમાં તેમની પૂછપરછ કરશે. આ મામલામાં પોલીસે અત્યાર સુધીમાં બે ખાનગી ગાર્ડની અટકાયત કરી લીધી છે. આ હિંસક ઘટના બાદ પટણાના કોચિંગ જગતમાં ભારે તણાવ વ્યાપી ગયો છે, જ્યાં એકતરફ ખાન સર આ હુમલા પાછળ હરીફ સંસ્થાઓનો હાથ હોવાનો આક્ષેપ કરી રહ્યા છે, તો બીજી તરફ હરીફ જૂથે પત્રકાર પરિષદ યોજીને દાવો કર્યો છે કે આ સમગ્ર વિવાદ પબ્લિસિટી મેળવવા માટે ખાન સર દ્વારા જ પ્રાયોજિત કરવામાં આવ્યો હતો. ખાન સર હવે ધરપકડથી બચવા માટે કોર્ટમાં આગોતરા જામીન અરજી દાખલ કરવાની તૈયારી કરી રહ્યા છે.