ઇટાવ:  ઉત્તર પ્રદેશના રાજકીય રીતે અત્યંત પ્રતિષ્ઠિત ગણાતા ઇટાવ જિલ્લાના સૈફઈમાં ધર્મ અને રાજકારણનો એક અનોખો સમન્વય જોવા મળ્યો છે. જ્યોતિષ પીઠાધીશ્વર શંકરાચાર્ય સ્વામી અવિમુક્તેશ્વરાનંદ સરસ્વતીની ગૌરક્ષા જનજાગૃતિ યાત્રા સૈફઈ પહોંચતા જ સમાજવાદી પાર્ટી (SP) ના યાદવ પરિવાર દ્વારા તેમનું અભૂતપૂર્વ અને ભવ્ય સ્વાગત કરવામાં આવ્યું હતું. આ ખાસ પ્રસંગે કન્નૌજના સપા સાંસદ ડિમ્પલ યાદવ અને પાર્ટીના વરિષ્ઠ નેતા શિવપાલ સિંહ યાદવે શંકરાચાર્યના ચરણોમાં વંદન કરી આશીર્વાદ મેળવ્યા હતા. સપાના આ દિગ્ગજ નેતાઓએ માત્ર આધ્યાત્મિક સન્માન જ ન કર્યું, પરંતુ દેશમાં ગાયોના સંરક્ષણ અને સંવર્ધન માટે શંકરાચાર્ય દ્વારા શરૂ કરાયેલા રાષ્ટ્રીય અભિયાનને સમાજવાદી પાર્ટીનું સત્તાવાર અને પૂર્ણ સમર્થન જાહેર કર્યું હતું.

કાર્યક્રમ દરમિયાન શંકરાચાર્ય સ્વામી અવિમુક્તેશ્વરાનંદે દેશમાં ગૌશાળાઓની કથળતી સ્થિતિ અને ગાયોની દુર્દશા અંગે ઊંડી ચિંતા વ્યક્ત કરી વર્તમાન ભાજપ સરકાર અને સ્થાનિક વહીવટીતંત્રની નીતિઓની આકરી ટીકા કરી હતી. તેમણે આક્રોશ સાથે આક્ષેપ કર્યો કે, પોતાને ગૌભક્ત ગણાવતી સરકારના શાસનમાં જ ગૌહત્યાને અડકતું પ્રોત્સાહન મળી રહ્યું છે અને પ્રશાસન તેમની આ પવિત્ર યાત્રાને રોકવા માટે તમામ પ્રયાસો કરી રહ્યું છે. શંકરાચાર્યએ ભારપૂર્વક જણાવ્યું કે, ગાય કોઈ સામાન્ય પશુ નથી પરંતુ તે ભારતીય સંસ્કૃતિમાં માતાનો દરજ્જો ધરાવે છે. તેમણે દેશને ચેતવણી આપતા ઉમેર્યું કે જો ભારતને સાચા અર્થમાં 'હિન્દુ રાષ્ટ્ર' બનાવવું હોય, તો સૌથી પહેલા ગૌહત્યાને સંપૂર્ણપણે નાબૂદ કરી ગાયોનું કાયદાકીય રક્ષણ સુનિશ્ચિત કરવું પડશે, કારણ કે ગૌરક્ષા વિના હિન્દુ રાષ્ટ્રની કલ્પના જ અશક્ય છે.

શંકરાચાર્યના આ ક્રાંતિકારી વિચારોને આવકારતા સાંસદ ડિમ્પલ યાદવે ભાવુક થઈને જણાવ્યું કે, અમે ભગવાન શ્રીકૃષ્ણના યાદવ વંશમાંથી આવીએ છીએ અને ગાયને અમારી માતા માનીને પૂજીએ છીએ, તેથી આ લડતમાં અમે તેમની સાથે છીએ. શિવપાલ સિંહ યાદવે પણ ભાજપ પર નિશાન સાધતા કહ્યું કે ગૌરક્ષાના નામે માત્ર વોટબેંકનું રાજકારણ ખેલાઈ રહ્યું છે, જ્યારે વાસ્તવિકતામાં ગાયો રસ્તા પર રઝળી રહી છે. ઉત્તર પ્રદેશની તમામ વિધાનસભાઓમાં જનજાગૃતિ ફેલાવવા નીકળેલી શંકરાચાર્યની આ 'ગૌ રક્ષા યાત્રા' ને સપા દ્વારા આટલું મોટું રાજકીય પ્લેટફોર્મ મળતાં આગામી દિવસોમાં યુપીના રાજકારણમાં ગૌરક્ષાનો મુદ્દો વધુ ગરમાય તેવા સ્પષ્ટ સંકેતો મળી રહ્યા છે.