નવી દિલ્હી : NEET પેપર લીકના મુદ્દાને લઈને દેશભરમાં યુવાનોના રોષનો જ્વાળામુખી ફાટી નીકળ્યો છે. અમેરિકાથી ભારત આવેલા CJP ના સ્થાપક અભિજીત દીપકેના નેતૃત્વમાં દિલ્હીના જંતર-મંતર ખાતે યોજાયેલું 'કોકરોચ આંદોલન' હવે માત્ર વિદ્યાર્થીઓના પ્રદર્શન સુધી સીમિત રહ્યું નથી, પરંતુ તે દેશના મોટા રાજકીય મુદ્દામાં ફેરવાઈ ગયું છે. સરકાર પાસે શિક્ષણ પ્રધાનના રાજીનામાની માંગ સાથે શરૂ થયેલા આ આંદોલને દેશના રાજકીય માહોલમાં ગરમાવો લાવી દીધો છે.

રાજકીય દિગ્ગજોના નિવેદનોએ વધાર્યો ગરમાવો

આંદોલનકારી યુવાનોના સમર્થનમાં વિરોધ પક્ષો એકજુટ જોવા મળી રહ્યા છે. આમ આદમી પાર્ટીના સંયોજક અરવિંદ કેજરીવાલે સરકાર પર આકરા પ્રહાર કરતા કહ્યું કે, મોદી સરકારે યુવાનોને 'રાષ્ટ્રવિરોધી' ગણાવવાને બદલે તેમની સમસ્યાઓનો ઉકેલ લાવવો જોઈએ. બીજી તરફ, શિવસેના (UBT) ના સાંસદ સંજય રાઉતે ઉદ્ધવ ઠાકરેનું નિવેદન ટાંકીને જણાવ્યું કે, દેશના ભવિષ્ય સમાન યુવાનો આજે રસ્તા પર ન્યાય માંગી રહ્યા છે, ત્યારે તેમને 'કોકરોચ' કહીને અપમાનિત કરવા એ સરકારની સંવેદનહીનતા દર્શાવે છે.

ભાજપનો પલટવાર: "વિદેશમાં બેઠેલા લોકોની ચાલ સફળ નહીં થાય"

આ તમામ આક્ષેપો વચ્ચે ભારતીય જનતા પાર્ટીએ આ આંદોલનને 'વિદેશી પ્રાયોજિત' ગણાવીને નિશાન સાધ્યું છે. ભાજપના નેતા નીતિન નવીને સીધું નામ લીધા વગર કહ્યું કે, "વિદેશમાં બેઠેલા કેટલાક લોકો એવું માને છે કે તેઓ ભારતના યુવાનોને દોરવણી આપી શકે છે, પરંતુ તે શક્ય નથી." તેમણે વધુમાં ઉમેર્યું કે, ભારતનો યુવાન જાગૃત છે અને દિલ્હી કે વિદેશમાં બેઠેલા કેટલાક લોકોની મુઠ્ઠીની કઠપૂતળી બનીને ક્યારેય પોતાની ગતિ બદલવાનો નથી.

આંદોલનનું ભવિષ્ય શું?

CJP દ્વારા આપવામાં આવેલી ડેડલાઇન પૂર્ણ થયા બાદ હવે અભિજીત દીપકેએ 'આજનો વિરોધ માત્ર ટ્રેલર હતો' કહીને આવનારા શનિવારે ફરી મોટા પ્રદર્શનના સંકેત આપ્યા છે. NEET પેપર લીક કાંડને લઈને લાખો વિદ્યાર્થીઓનું ભવિષ્ય દાવ પર લાગેલું છે, ત્યારે આ આંદોલન માત્ર વિદ્યાર્થીઓની માંગ સુધી મર્યાદિત રહે છે કે પછી તે આગામી ચૂંટણીઓમાં રાજકીય સમીકરણો બદલવાની ક્ષમતા ધરાવે છે, તે જોવું ખૂબ જ રસપ્રદ રહેશે.