નવી દિલ્હી:  ભારત અને ઇન્ડોનેશિયાએ બદલાતા વૈશ્વિક સમીકરણો વચ્ચે પોતાના દ્વિપક્ષીય અને વ્યાપક વ્યૂહાત્મક સંબંધોને એક નવી ઊંચાઈ પર લઈ જવાનો શંખનાદ કર્યો છે. નવી દિલ્હીમાં યોજાયેલી ભારત-ઇન્ડોનેશિયા સંયુક્ત કમિશનની આઠમી બેઠકમાં ભારતના વિદેશ મંત્રી એસ. જયશંકર અને ઇન્ડોનેશિયાના વિદેશ મંત્રી સુગિઓનોએ સહ-અધ્યક્ષતા કરી હતી. બન્ને પડોશી દેશોએ હિંદ-પ્રશાંત (ઇન્ડો-પેસિફિક) ક્ષેત્રમાં સ્થિરતા, કાયદા આધારિત વ્યવસ્થા અને દરિયાઈ સુરક્ષા મજબૂત કરવા માટે અભૂતપૂર્વ સંમતિ સાધી છે, જે ભવિષ્યમાં પ્રાદેશિક સત્તા સંતુલન જાળવવામાં નિર્ણાયક સાબિત થશે.

આ ઉચ્ચ સ્તરીય બેઠકમાં માત્ર સંરક્ષણ જ નહીં, પરંતુ ભવિષ્યના આર્થિક મોરચા જેવા કે ફિનટેક, ડિજિટલ કનેક્ટિવિટી, ક્રિટિકલ મિનરલ્સ (મહત્વપૂર્ણ ખનિજો), ફાર્માસ્યુટિકલ્સ અને શિક્ષણ ક્ષેત્રે સહયોગ વધારવા માટે નવી ક્રાંતિકારી તકો પર વ્યાપક ચર્ચા થઈ હતી. વિદેશ મંત્રી એસ. જયશંકરે સોશિયલ મીડિયા પર આ બેઠકને અત્યંત સકારાત્મક ગણાવતા ઉમેર્યું કે ભારતની 'એક્ટ ઇસ્ટ' નીતિ હેઠળ ઇન્ડોનેશિયા આપણું પ્રમુખ ભાગીદાર છે. વર્ષ ૨૦૨૫ના પ્રજાસત્તાક દિવસ પર મુખ્ય અતિથિ તરીકે આવેલા ઇન્ડોનેશિયાના રાષ્ટ્રપતિ પ્રબોવો સુબિયાન્ટોની ભારત મુલાકાતે આ સંબંધોમાં પહેલેથી જ એક નવી ઉર્જા ફૂંકી દીધી છે.

બંને દેશો વચ્ચે પ્રવાસન અને સાંસ્કૃતિક આદાન-પ્રદાન વધારીને પીપલ-ટુ-પીપલ કનેક્ટિવિટી મજબૂત કરવા પર પણ વિશેષ ભાર મૂકવામાં આવ્યો છે. ઇન્ડોનેશિયાના વિદેશ મંત્રી સુગિઓનોએ ભારતના ડિજિટલ માળખાના વખાણ કરતા જણાવ્યું કે તેમનો દેશ વડાપ્રધાન નરેન્દ્ર મોદીની આગામી પ્રસ્તાવિત જકાર્તા મુલાકાતની આતુરતાથી રાહ જોઈ રહ્યો છે. પીએમ મોદીનો આ આગામી પ્રવાસ બંને દેશો વચ્ચેના સંરક્ષણ અને આર્થિક જોડાણને મજબૂત ઔપચારિક કાનૂની સ્વરૂપ આપીને એશિયા-પેસિફિક ક્ષેત્રમાં વિકાસના નવા દ્વાર ખોલશે.