વોશિંગ્ટન:  ચીનના રાષ્ટ્રપતિ શી જિનપિંગે તાઇવાન પર કબજો કરવા માટે એક અત્યંત ખતરનાક અને અદ્રશ્ય હથિયાર બહાર પાડ્યું છે, જેને યુએસ કોંગ્રેસના તાજેતરના અહેવાલમાં "લોફેર" (કાયદાકીય વ્યવસ્થા) તરીકે ઓળખાવવામાં આવ્યું છે. ચીન હવે માત્ર આકાશ અને સમુદ્રમાં સૈન્ય શક્તિ પ્રદર્શિત કરવા પૂરતું મર્યાદિત નથી, પરંતુ તે પોતાના જિદ્દી કાયદાઓ અને કઠપૂતળી અદાલતો દ્વારા તાઇવાનના અસ્તિત્વને મિટાવવાનો પ્રયાસ કરી રહ્યું છે. આ નવી રણનીતિ હેઠળ, ચીન તાઇવાનની અલગ ઓળખ અને લોકશાહીનું સમર્થન કરનારા નેતાઓ, કાર્યકરો અને વૈજ્ઞાનિકોને કાનૂની શિકાર બનાવી રહ્યું છે, જે યુદ્ધ વગર જ વિજય મેળવવાની ડ્રેગનની જૂની ચાલનો ભાગ છે.

આ આક્રમક કાનૂની યુદ્ધના પ્રથમ ભોગ તરીકે તાઇવાનના અગ્રણી સાંસદ પુમા શેન બન્યા છે, જેમને ચીને "તાઇવાન સ્વતંત્રતાના કટ્ટર સમર્થક" જાહેર કરીને તેમની સામે ચોંગકિંગ વહીવટીતંત્ર દ્વારા સત્તાવાર ફોજદારી તપાસ શરૂ કરી દીધી છે. ઇતિહાસમાં આ પ્રથમ ઘટના છે જ્યારે ચીને તાઇવાનના કોઈ ચૂંટાયેલા જનપ્રતિનિધિ વિરુદ્ધ પોતાના દેશમાં ગુનાહિત કેસ દાખલ કર્યો હોય. આ પગલા દ્વારા બેઇજિંગ સમગ્ર વિશ્વને એવો સંદેશ આપવા માંગે છે કે તાઇવાન તેનો જ એક હિસ્સો છે અને ત્યાંના નાગરિકો પર ચીની ન્યાયતંત્રનો સંપૂર્ણ અધિકાર છે, જેનાથી ભવિષ્યમાં અન્ય તાઇવાની નેતાઓ પર ધરપકડનું જોખમ વધી ગયું છે.

અમેરિકી અહેવાલમાં એવો પણ ખુલાસો કરાયો છે કે ચીન પોતાની આ કાનૂની દાદાગીરીને વૈશ્વિક સ્તરે સ્વીકાર્ય બનાવવા માટે આંતરરાષ્ટ્રીય સંસ્થાઓ અને લોકશાહી મંચોને પણ પ્રભાવિત કરી રહ્યું છે. ગયા વર્ષે બ્રસેલ્સમાં યોજાયેલી આંતર-સંસદીય જોડાણ (IPAC) ની પરિષદને નિષ્ફળ બનાવવા માટે ચીને સભ્ય દેશો પર ભારે રાજદ્વારી દબાણ લાવ્યું હતું જેથી કોઈ તાઇવાનની તરફેણમાં અવાજ ન ઉઠાવે. નિષ્ણાતો ચેતવણી આપી રહ્યા છે કે જો ચીનની આ ન્યાયિક આક્રમકતાને અત્યારે જ અટકાવવામાં નહીં આવે, તો તે ભવિષ્યમાં તાઇવાન સાર્વભૌમત્વના મુદ્દે વૈશ્વિક સ્તરે મોટો ખતરો ઉભો કરશે.