નવી દિલ્‍હી, તા.૮:  પશ્‍ચિમ એશિયામાં ફરી એકવાર ફાટી નીકળેલી યુદ્ધની જ્‍વાળાઓએ વૈશ્વિક અર્થતંત્રની ઊંઘ હરામ કરી દીધી છે. ઇઝરાયલ દ્વારા લેબનોન પર કરવામાં આવેલા ભીષણ હવાઈ હુમલાઓ બાદ આંતરરાષ્‍ટ્રીય બજારમાં ક્રૂડ ઓઇલની કિંમતોમાં અચાનક ૨% થી વધુનો તીવ્ર ઉછાળો જોવા મળ્‍યો છે. તાજેતરના ટ્રેડિંગ સેશનમાં યુએસ ક્રૂડ ૨.૩૨% વધીને ઼૯૨.૬૪ પ્રતિ બેરલ અને બ્રેન્‍ટ ક્રૂડ ઓઇલ ૨.૫% ની તેજી સાથે ઼૯૫.૪૨ પ્રતિ બેરલની સપાટીએ પહોંચી ગયું છે. થોડા દિવસો પહેલાં જ બન્ને દેશો વચ્‍ચે યુદ્ધવિરામની જે આશા જન્‍મી હતી, તેના પર આ નવા હુમલાઓએ સંપૂર્ણપણે પાણી ફેરવી દીધું છે, જેના કારણે રોકાણકારોમાં તેલ પુરવઠો ખોરવાઈ જવાનો મોટો ફફડાટ ફેલાયો છે.

આ વૈશ્વિક કટોકટી પાછળ હોર્મુઝ પર તોળાઈ રહેલું જોખમ સૌથી મોટું કારણ માનવામાં આવે છે, જ્‍યાંથી સમગ્ર વિશ્વના તેલ વેપારનો એક વિશાળ હિસ્‍સો પસાર થાય છે. આ વ્‍યૂહાત્‍મક દરિયાઈ માર્ગ પર ઈરાન તરફથી સંભવિત નાકાબંધી અને કડક પ્રતિબંધોના કારણે સપ્‍લાય ચેઈન પહેલેથી જ દબાણમાં છે, અને જો આ તણાવ લાંબો ચાલશે તો તેલ બજારમાં હાહાકાર મચી શકે છે. બીજી તરફ, ઓપેક પ્‍લસ દેશોએ બજારને શાંત કરવા માટે તેલનું ઉત્‍પાદન વધારવાનો નિર્ણય તો લીધો છે, પરંતુ આંતરિક મર્યાદાઓના કારણે ઘણા દેશો નક્કી કરેલા લક્ષ્યાંક મુજબ ઉત્‍પાદન વધારી શકયા નથી, જેના કારણે આ નિર્ણય બજારને રાહત આપવામાં સંપૂર્ણપણે નિષ્‍ફળ સાબિત થયો છે.

આ આંતરરાષ્‍ટ્રીય ઉથલપાથલની સીધી અને ઘાતક અસર ભારત પર પડવાની પૂરેપૂરી સંભાવના છે, કારણ કે ભારત પોતાની જરૂરિયાતનું મોટાભાગનું ક્રૂડ ઓઇલ વિદેશથી આયાત કરે છે. ઓઇલ માર્કેટિંગ કંપનીઓ પર વધતા દબાણને કારણે આગામી દિવસોમાં દેશમાં પેટ્રોલ અને ડીઝલના ભાવ સામાન્‍ય જનતાના ખિસ્‍સા પર વધુ બોજ નાખી શકે છે. નોંધનીય છે કે, છેલ્લા એક જ મહિનામાં ઇંધણના ભાવમાં ચાર વખત વધારો ઝીંકવામાં આવ્‍યો છે, જેના કારણે પેટ્રોલપ્રડીઝલ પ્રતિ લિટર રૂ.૭.૫૦ થી રૂ. ૮ સુધી મોંઘા થઈ ચૂકયા છે. જો આ વૈશ્વિક ભડકો શાંત નહીં થાય, તો ટ્રાન્‍સપોર્ટેશન ખર્ચ વધવાથી શાકભાજી અને દૂધ જેવી રોજિંદી ચીજવસ્‍તુઓ મોંઘી થશે અને દેશમાં મોંઘવારીનો નવો રાઉન્‍ડ શરૂ થઈ શકે છે.