નવી દિલ્‍હી, તા.૮: મે મહિનામાં યોજાયેલી NEET-UG પરીક્ષાના વિવાદ અને પેપર લીકના આક્ષેપો બાદ, આ વખતે નેશનલ ટેસ્‍ટિંગ એજન્‍સી (NTA) અને કેન્‍દ્રીય શિક્ષણ મંત્રાલયે ઇતિહાસનો સૌથી કડક સુરક્ષા પ્‍લાન તૈયાર કર્યો છે. આગામી ૨૧ જૂને યોજાનારી પુનઃપરીક્ષાને સંપૂર્ણપણે પારદર્શક અને ફૂલપ્રૂફ બનાવવા માટે પેપર સેટ કરનારા અને તેનો અનુવાદ કરનારા તમામ વિષય નિષ્‍ણાતોને એક અજ્ઞાત અને અત્‍યંત સુરક્ષિત લોકેશન પર ‘ડિજિટલ જેલ' એટલે કે સખત લોકડાઉન હેઠળ રાખવામાં આવ્‍યા છે. દેશના ૨૨ લાખથી વધુ મેડિકલ ઉમેદવારોના ભવિષ્‍ય સાથે જોડાયેલી આ પરીક્ષાની ગુપ્તતા જાળવવા માટે સરકારે આ વખતે સુરક્ષાનું એવું સ્‍તર તૈયાર કર્યું છે જે અગાઉ કયારેય જોવા મળ્‍યું નથી.

આ કડક લોકડાઉન હેઠળ, ગુપ્ત સુવિધામાં રહેતા તમામ નિષ્‍ણાતોના મોબાઈલ ફોન, લેપટોપ, ટેબ્‍લેટ અને સ્‍માર્ટવોચ જેવા તમામ સંચાર ઉપકરણો જપ્ત કરી લેવામાં આવ્‍યા છે. આ કેમ્‍પસમાં ઇન્‍ટરનેટ એક્‍સેસ સંપૂર્ણપણે બંધ છે અને પરીક્ષા પૂરી ન થાય ત્‍યાં સુધી આ નિષ્‍ણાતોને તેમના પરિવાર સહિત બહારની દુનિયાના કોઈપણ વ્‍યક્‍તિ સાથે સંપર્ક કરવાની સખત મનાઈ છે. આટલું જ નહીં, આ વખતે NTAએ સમગ્ર ઓપરેશનને અલગ-અલગ વિભાગોમાં વહેંચી દીધું છે, જેથી પેપર પ્રિન્‍ટિંગથી લઈને પેકેજિંગ અને ટ્રાન્‍સપોર્ટેશન સુધીની સાંકળમાં કોઈ એક વ્‍યક્‍તિ કે ગ્રુપ પાસે તમામ માહિતી ન રહે. કેન્‍દ્રો પર સમયસર અને સુરક્ષિત રીતે પ્રશ્‍નપત્રો પહોંચાડવા માટે ભારતીય વાયુસેના (IAF) ના વિમાનોની મદદ લેવાની પણ યોજના છે.

બીજી તરફ, સોશિયલ મીડિયા પર ફેલાતી અફવાઓ અને નકલી પેપરોના કાળાબજારને રોકવા માટે સરકારની સ્‍પેશિયલ ટીમ દ્વારા વ્‍હોટ્‍સએપ, ટેલિગ્રામ અને અન્‍ય ઓનલાઈન ફોરમ પર ૨૪ કલાક કડક મોનિટરિંગ કરવામાં આવી રહ્યું છે. શિક્ષણ મંત્રી ધર્મેન્‍દ્ર પ્રધાને પોતે આદેશ આપ્‍યા છે કે અગાઉની પરીક્ષામાં જે પણ ખામીઓ રહી ગઈ હતી તેને જડમૂળથી ઉખાડી ફેંકવામાં આવે. આ મહાપરીક્ષા ૨૧ જૂને બપોરે ૨:૦૦ થી સાંજના ૫:૧૫ વાગ્‍યા દરમિયાન પરંપરાગત પેન-એન્‍ડ-પેપર મોડમાં યોજાશે, જેના માટે ભારતના ૫૫૧ શહેરો અને વિદેશના ૧૪ સેન્‍ટરો પર સુરક્ષા વ્‍યવસ્‍થા લોખંડી કરી દેવામાં આવી છે.