તા. ૧૦ સપ્ટેમ્બર ર૦ર૬ વિક્રમ સંવત ર૦૮૨ શ્રાવણ વદ – ૧૪ ગુરૂવાર
દિલ્હી એરપોર્ટ પર ભારે પવનના કારણે એરઇન્ડિયાના ૩ વિમાનો રમકડાની જેમ અથડાયા
લોખંડના ભારે સ્ટેન્ડ હવામાં ઉડયાઃ કરોડોનું નુકશાન
નવી દિલ્હી, તા.૮: રાજધાની દિલ્હીના પ્રતિષ્ઠિત ઇન્દિરા ગાંધી આંતરરાષ્ટ્રીય એરપોર્ટ પર પલભરમાં જ સમગ્ર રનવે હાઈ-વોલ્ટેજ ડ્રામાનું કેન્દ્ર બની ગયો. અચાનક ત્રાટકેલા ભયાનક વાવાઝોડા અને સુસવાટા મારતા પવને એરપોર્ટના ટર્મિનલ-૨ પર ભારે અરાજકતા સર્જી હતી. પવનની ગતિ એટલી તીવ્ર હતી કે જમીન પર રાખવામાં આવેલા એરપોર્ટના મજબૂત ગ્રાઉન્ડ સપોર્ટ સાધનો કાગળની જેમ ફંગોળાયા હતા. આ ભયંકર તોફાનમાં લોખંડની સ્ટેપ સીડીઓ અને ભારેખમ મેન્ટેનન્સ પ્લેટફોર્મ્સ પોતાની જગ્યાએથી ખસીને ત્યાં પાર્ક કરેલા એર ઇન્ડિયાના ત્રણ આધુનિક વિમાનો સાથે જોરભેર અથડાયા હતા, જેના કારણે એરપોર્ટ પર દોડધામ મચી ગઈ હતી.
આ અણધાર્યા અકસ્માતને પગલે એર ઇન્ડિયાના ત્રણેય વિમાનોને તાત્કાલિક અસરથી સેવામાંથી હટાવીને ગ્રાઉન્ડ કરી દેવામાં આવ્યા છે અને એન્જિનિયરોની ટીમ દ્વારા તેનું ટેકનિકલ નિરીક્ષણ શરૂ કરાયું છે. સત્તાવાર સૂત્રોના જણાવ્યા અનુસાર, આ ટક્કરમાં એક વિમાનને ખૂબ જ ગંભીર અને નોંધપાત્ર નુકસાન પહોંચ્યું છે, જેને ફરીથી આકાશમાં ઉડવા લાયક બનાવવામાં ઘણો સમય લાગી શકે છે. જ્યારે બાકીના બે વિમાનોને સામાન્ય નુકસાન થયું હોવાથી ચાલુ સપ્તાહના અંત સુધીમાં ફરી સેવામાં કાર્યરત કરવામાં આવે તેવી શકયતા છે. જો કે, આ અકસ્માતને કારણે એરલાઇન્સના શિડ્યુલ પર વિપરીત અસર પડી છે અને અનેક ફ્લાઇટ્સ મોડી પડતાં મુસાફરોને ભારે હાલાકી ભોગવવી પડી રહી છે.
આ ઘટનાએ એરપોર્ટની હવામાન આગાહી પ્રણાલી અને ગ્રાઉન્ડ હેન્ડલિંગ એજન્સીઓની ગંભીર બેદરકારીને સપાટી પર લાવી દીધી છે. સામાન્ય નિયમો મુજબ, આવા તોફાની હવામાનની અગાઉથી ચેતવણી મળતી જ હોય છે, જે અંતર્ગત તમામ ગ્રાઉન્ડ સાધનોને સાંકળો કે લોક વડે સુરક્ષિત રીતે બાંધી દેવાના હોય છે, પરંતુ આ કિસ્સામાં એવું કંઈ ન થતાં એરપોર્ટ મેનેજમેન્ટ સામે સવાલો ઉઠ્યા છે. નોંધનીય છે કે, એર ઇન્ડિયાના વિમાનો સાથે આ પ્રકારની અસામાન્ય ઘટના પહેલીવાર નથી બની; આ જ વર્ષે જાન્યુઆરીમાં પણ દિલ્હી એરપોર્ટ પર ભારે ધુમ્મસ વચ્ચે એક અસુરક્ષિત સામાનનું કન્ટેનર એર ઇન્ડિયાના બ્રાન્ડ ન્યૂ એરબસ A૩૫૦ના એન્જિન સાથે અથડાયું હતું. વારંવાર બનતી આવી ઘટનાઓ હવે એરપોર્ટ સુરક્ષા સામે મોટું પ્રશ્નાર્થચિﾎ ખડું કરે છે.
(3:12 PM IST)
છેલ્લા 8 દિવસમાં સૌથી લોકપ્રિય 
