ચેન્નાઈ, તા. 08: નોર્વે ચેસ 2026 માં વિશ્વના દિગ્ગજ ખેલાડીઓને માત આપીને ઈતિહાસ રચનાર ભારતીય ગ્રાન્ડમાસ્ટર આર. પ્રજ્ઞાનંધાનું આજે ચેન્નાઈમાં ભવ્ય સન્માન કરવામાં આવ્યું હતું. તમિલનાડુના મુખ્યમંત્રી સી. જોસેફ વિજયે સચિવાલય ખાતે આયોજિત એક કાર્યક્રમમાં 20 વર્ષીય આ યુવા ચેસ સેન્સેશનને ₹50 લાખનું રોકડ ઇનામ આપીને ગૌરવવંતુ સન્માન કર્યું હતું. આ દરમિયાન એક રસપ્રદ ક્ષણ ત્યારે જોવા મળી જ્યારે મુખ્યમંત્રી અને પ્રજ્ઞાનંધા વચ્ચે ચેસની એક મૈત્રીપૂર્ણ રમત રમાઈ હતી, જેમાં પણ પ્રજ્ઞાનંધાએ પોતાની કુશળતા બતાવી વિજય મેળવ્યો હતો.
વિશ્વના દિગ્ગજોનો કર્યો પરાભવ
પ્રજ્ઞાનંધાએ ઓસ્લોમાં રમાયેલી નોર્વે ચેસ ટૂર્નામેન્ટમાં અસાધારણ પ્રદર્શન કરીને મેગ્નસ કાર્લસન, ડી. ગુકેશ અને અલીરેઝા ફિરોઝા જેવા વિશ્વના સર્વશ્રેષ્ઠ ખેલાડીઓને પાછળ છોડી દીધા હતા. ફાઈનલ રાઉન્ડમાં જર્મનીના વિન્સેન્ટ કીમરને હરાવીને ટાઇટલ જીતનાર તે પ્રથમ ભારતીય ખેલાડી બન્યા છે. ખાસ કરીને વર્લ્ડ નંબર-1 મેગ્નસ કાર્લસન સામેની તેમની સતત જીત અને આક્રમક રમતની ચર્ચા આંતરરાષ્ટ્રીય સ્તરે થઈ રહી છે. સતત ચાર ક્લાસિકલ જીત સાથે ટુર્નામેન્ટ પૂરી કરવી એ તેમના ઉત્કૃષ્ટ ફોર્મની સાક્ષી પૂરે છે.
તમિલનાડુ માટે ગર્વની ક્ષણ
રાજ્ય સરકાર દ્વારા આ સન્માન સમારંભનું આયોજન એ વાતનું પ્રતીક છે કે તમિલનાડુ વૈશ્વિક સ્તરે રમતગમતના વિકાસને કેટલું મહત્વ આપે છે. મુખ્યમંત્રી કાર્યાલયે ટ્વિટ કરીને જણાવ્યું હતું કે, પ્રજ્ઞાનંધાની આ સિદ્ધિ માત્ર રાજ્ય જ નહીં, પરંતુ સમગ્ર ભારત માટે પ્રેરણારૂપ છે. રમત વિકાસ સત્તામંડળ દ્વારા આપવામાં આવેલ આ પુરસ્કાર તેમની મહેનત અને સમર્પણનું યોગ્ય મૂલ્યાંકન છે.
ભવિષ્યનો ચેમ્પિયન
નોર્વે ચેસની આ જીત પ્રજ્ઞાનંધાની કારકિર્દીના અત્યાર સુધીના સૌથી મહત્વપૂર્ણ ટાઇટલ પૈકીનું એક છે. કાર્લસન જેવા દિગ્ગજોને તેમની ઘરઆંગણે હરાવવા એ સાબિત કરે છે કે પ્રજ્ઞાનંધા હવે વિશ્વ ચેસના આગામી મોટા ચેમ્પિયન બનવા માટે તૈયાર છે. આ સન્માન સમારંભ પછી હવે ચાહકો તેમને આગામી આંતરરાષ્ટ્રીય ટુર્નામેન્ટમાં પણ આવી જ સફળતા મેળવતા જોવા માટે આતુર છે.