પુણે, તા. 08: પુણેના દૌંડ તાલુકાના કેડગાંવમાં એક ખાનગી હોસ્પિટલમાં ગેરકાયદેસર ગર્ભપાતનું મોટું રેકેટ ઝડપાયું છે. મેડિકલ ટર્મિનેશન ઓફ પ્રેગ્નન્સી (MTP) એક્ટના નિયમોનું સરેઆમ ઉલ્લંઘન કરીને કરવામાં આવતી ગર્ભપાત પ્રક્રિયાઓની ગંભીર અનિયમિતતાઓ સામે આવતા પોલીસે કડક કાર્યવાહી હાથ ધરી છે. આ મામલે પોલીસે ડૉ. તુકારામ યશવંત મોટેની ધરપકડ કરી છે, જ્યારે મુખ્ય આરોપી મહિલા ડોક્ટર ડૉ. સ્વાતિ લવંગારે પોલીસના હાથમાં આવતા પહેલા જ ફરાર થઈ ગઈ છે.
શું છે સમગ્ર કૌભાંડ?
કેડગાંવ સ્થિત 'લવંગારે મેટરનિટી એન્ડ ઇન્ફર્ટિલિટી હોસ્પિટલ' ખાતે જિલ્લા-સ્તરીય સમિતિ દ્વારા કરવામાં આવેલા અચાનક નિરીક્ષણમાં ચોંકાવનારી વિગતો બહાર આવી હતી. હોસ્પિટલના રજિસ્ટર, સંમતિ ફોર્મ અને પ્રવેશ રેકોર્ડની તપાસ કરતા જાણવા મળ્યું કે, અનેક ગર્ભપાત પ્રક્રિયાઓ કાયદાકીય દસ્તાવેજો અને વૈજ્ઞાનિક ધોરણોનું પાલન કર્યા વિના કરવામાં આવી હતી. હોસ્પિટલમાંથી આઠ MTP કીટ પણ મળી આવી હતી, જેનો ઉપયોગ ગેરકાયદેસર રીતે કરવામાં આવ્યો હોવાની આશંકા છે.
અનધિકૃત વ્યક્તિ દ્વારા ગર્ભપાતનો આક્ષેપ
પોલીસ તપાસમાં એક વધુ આઘાતજનક ખુલાસો થયો છે કે, હોસ્પિટલમાં કેટલીક ગર્ભપાતની પ્રક્રિયાઓ એક એવા વ્યક્તિ દ્વારા કરવામાં આવી હતી, જે મેડિકલ ક્ષેત્રે આવી પ્રક્રિયાઓ કરવા માટે અધિકૃત નથી. આ વ્યક્તિનું નામ અન્નાસાહેબ ગિરી હોવાનું જાણવા મળ્યું છે, જેની ધરપકડ કરી લેવામાં આવી છે. પોલીસના જણાવ્યા અનુસાર, આરોપી ડોક્ટરો અને અન્ય સ્ટાફ દ્વારા નાણાકીય વ્યવહારો મોટેભાગે રોકડમાં કરવામાં આવતા હતા, જેથી આ રેકેટ કેટલા સમયથી અને કેટલા ગર્ભપાત સાથે સંકળાયેલું છે તે નક્કી કરવું તપાસ અધિકારીઓ માટે પડકારરૂપ બન્યું છે.
આરોપીઓની શોધખોળ ચાલુ
યાવત પોલીસ સ્ટેશનમાં નોંધાયેલા આ કેસમાં ડૉ. સ્વાતિ લવંગારેની ભૂમિકા અત્યંત શંકાસ્પદ માનવામાં આવે છે. કેસ નોંધાવાની ગંધ આવતા જ તેઓ હોસ્પિટલ છોડીને ફરાર થઈ ગયા છે. દૌંડ ડિવિઝનના નાયબ પોલીસ અધિક્ષક બાપુરાવ દાદાસના માર્ગદર્શન હેઠળ પોલીસની ટીમો તેમના સંભવિત ઠેકાણાઓ પર દરોડા પાડી રહી છે. આ સમગ્ર ઘટનાએ પુણે ગ્રામીણ વિસ્તારમાં ચાલી રહેલી ખાનગી હોસ્પિટલોની કાર્યપદ્ધતિ પર મોટા સવાલો ઉભા કર્યા છે. પોલીસે આ કેસમાં વધુ કડક તપાસ શરૂ કરી છે અને ટૂંક સમયમાં અન્ય સંડોવાયેલા વ્યક્તિઓની ધરપકડ કરવામાં આવશે તેમ જણાવ્યું છે.