કોલકાતા,  પશ્ચિમ બંગાળના રાજકારણમાં આજે એક નવો વળાંક આવ્યો છે, જેમાં તૃણમૂલ કોંગ્રેસ (TMC) ના સાંસદો વચ્ચેના આંતરિક મતભેદો જાહેર મંચ પર આવી ગયા છે. પક્ષના ૨૦ બળવાખોર સાંસદો દ્વારા NDA ને ટેકો આપવાના અહેવાલો વચ્ચે, ટીએમસીના ફાયરબ્રાન્ડ નેતા મહુઆ મોઇત્રાએ સીધો જ યુસુફ પઠાણ પર નિશાન સાધ્યું છે. મોઇત્રાએ સોશિયલ મીડિયા પ્લેટફોર્મ X પર કરેલી પોસ્ટથી રાજકીય વર્તુળોમાં ભારે ચકચાર મચી ગઈ છે.

"તમે ભારત માટે રમ્યા છો, થોડી શરમ રાખો"

પોતાની પોસ્ટમાં મહુઆ મોઇત્રાએ અત્યંત આકરા શબ્દોનો પ્રયોગ કર્યો છે. તેમણે યુસુફ પઠાણ પર આરોપ લગાવ્યો કે કેન્દ્રીય ગૃહમંત્રી અમિત શાહનો ફોન આવતા જ તેઓ ડરીને દિલ્હી તરફ દોડી રહ્યા છે. મોઇત્રાએ લખ્યું, "યુસુફ પઠાણ, તમે દિલ્હી શા માટે ઉતાવળમાં જઈ રહ્યા છો? શું અમિત શાહે તમને ફોન કર્યો છે? થોડી હિંમત રાખો. તમે ભારત માટે રમ્યા છો, તમને તમારા જિલ્લાએ વિશ્વાસ સાથે મોટા માર્જિનથી મત આપ્યો છે, તેથી થોડી શરમ અને હિંમત રાખો."

ટીએમસીમાં વધતા જતાં રાજકીય ભંગાણની અટકળો

આ નિવેદન એવા સમયે આવ્યું છે જ્યારે એવી ચર્ચાઓ જોરશોરથી ચાલી રહી છે કે ટીએમસીના ૨૦ જેટલા સાંસદોએ લોકસભા સ્પીકર ઓમ બિરલાને પત્ર લખીને NDA ને પોતાનું સમર્થન જાહેર કર્યું છે. આ સાંસદોના જૂથે દિલ્હીમાં ગુપ્ત મુલાકાત પણ કરી હોવાના અહેવાલ છે, જેનાથી પક્ષમાં મોટું ભંગાણ થવાની આશંકા સેવાઈ રહી છે. મહુઆ મોઇત્રાની આ ટિપ્પણીએ પક્ષની અંદરના ઊંડા અસંતોષ પર મહોર મારી દીધી છે.

યુસુફ પઠાણ અને અફવાઓનું ખંડન

યુસુફ પઠાણે તાજેતરમાં જ પોતાની બહેરામપુર લોકસભા બેઠક પરથી રાજીનામું આપવાની વાતોને સંપૂર્ણપણે નકારી કાઢી હતી. તેમણે મમતા બેનર્જી કે પાર્ટી દ્વારા રાજીનામું માંગવામાં આવ્યું હોવાની વાતને પાયાવિહોણી ગણાવી હતી. આ ઉપરાંત, પૂર્વ ભારતીય કેપ્ટન સૌરવ ગાંગુલીએ પણ મમતા બેનર્જી વતી યુસુફ પઠાણનો સંપર્ક કર્યો હોવાની અફવાઓને સ્પષ્ટપણે ખોટી ગણાવી હતી.

મહુઆ મોઇત્રાની આ પોસ્ટ બાદ સોશિયલ મીડિયા પર સમર્થકો અને ટીકાકારો વચ્ચે જંગ છેડાયો છે. એક તરફ જ્યાં મોઇત્રાના સમર્થકો તેમના આક્રમક વલણના વખાણ કરી રહ્યા છે, તો બીજી તરફ ઘણા લોકો પૂરાવા માંગતા જોવા મળે છે. પશ્ચિમ બંગાળના આ રાજકીય સમીકરણો હવે કઈ દિશામાં વળશે, તે જોવું ખૂબ જ રસપ્રદ રહેશે.