નવી દિલ્હી, તા. ૦૯ જૂન, ૨૦૨૬: સંયુક્ત રાષ્ટ્ર સુરક્ષા પરિષદ (UNSC) ના મંચ પર પાકિસ્તાનનો અસલી ચહેરો ફરી એકવાર ખુલ્લો પડી ગયો છે. પાકિસ્તાન દ્વારા પોતાની આંતરિક નિષ્ફળતાઓ અને બલુચિસ્તાન જેવા વિસ્તારોમાં ફેલાયેલી અશાંતિનો દોષ ભારત પર ઢોળવા માટે 'ફિત્ના અલ-હિન્દુસ્તાન' જેવા ધાર્મિક ઝેરથી ભરેલા શબ્દોનો ઉપયોગ કરવામાં આવી રહ્યો છે. ભારતે આ ખોટી માહિતીની ફેક્ટરીને સખત શબ્દોમાં વખોડી કાઢી છે અને પાકિસ્તાનને સ્પષ્ટ સંદેશ આપ્યો છે કે હિંસા અને ખોટા આક્ષેપો દ્વારા તે પોતાની જવાબદારીમાંથી બચી શકશે નહીં.
શું છે આ 'ફિત્ના અલ-હિન્દુસ્તાન'નું કાવતરું?
અરબી ભાષામાં 'ફિત્ના અલ-હિન્દુસ્તાન'નો અર્થ થાય છે 'ભારતની અવ્યવસ્થા'. પાકિસ્તાન સરકાર અને તેની લશ્કરી સંસ્થાએ આ શબ્દનો ઉપયોગ બલુચિસ્તાનના સ્થાનિક બળવાખોર જૂથોને આતંકવાદી ગણાવીને તેમને 'ભારત દ્વારા સમર્થિત' તરીકે ચિતરવા માટે શરૂ કર્યો છે. પાકિસ્તાનનો દાવો છે કે બલુચિસ્તાનમાં ચાલી રહેલો સંઘર્ષ ભારતનું કારસ્તાન છે. જોકે, આ દાવાઓને સાબિત કરવા માટે ઈસ્લામાબાદ પાસે આજદિન સુધી કોઈ નક્કર પુરાવા નથી. ભારતનું માનવું છે કે પાકિસ્તાન પોતાની જનતાનું ધ્યાન દેશના આર્થિક અને રાજકીય સંકટો પરથી હટાવવા માટે આવી કાલ્પનિક વાર્તાઓ રચી રહ્યું છે.
યુએનમાં ભારતની લાલ આંખ
સંયુક્ત રાષ્ટ્રમાં ભારતના કાયમી પ્રતિનિધિ પર્વતાનેની હરીશે પાકિસ્તાન પર આકરા પ્રહારો કરતા તેને 'નફરતની સંગઠિત ફેક્ટરી' ગણાવી હતી. તેમણે કહ્યું, "ફિત્ના અલ-હિન્દુસ્તાન જેવી પરિભાષાઓ માત્ર સરકારી પ્રાયોજિત ખોટી માહિતી છે." ભારતે સ્પષ્ટ કર્યું છે કે પાકિસ્તાન માત્ર ભારતને બદનામ કરવામાં જ વ્યસ્ત નથી, પરંતુ તેના પડોશી દેશ અફઘાનિસ્તાનની સાર્વભૌમત્વને પણ નુકસાન પહોંચાડી રહ્યું છે.
પાકિસ્તાન-અફઘાનિસ્તાન વચ્ચે લોહિયાળ સરહદ
યુએનના અહેવાલ મુજબ, પાકિસ્તાનની લશ્કરી કાર્યવાહીને કારણે સરહદી વિસ્તારોમાં માનવીય સંકટ ઊભું થયું છે. પાકિસ્તાની હવાઈ હુમલામાં અત્યાર સુધીમાં સેંકડો નાગરિકોના મોત થયા છે અને ૧ લાખથી વધુ લોકો વિસ્થાપિત થયા છે. ભારતનું માનવું છે કે લશ્કરી કાર્યવાહીના નામે નિર્દોષ નાગરિકોની હત્યા કરીને આતંકવાદનો સામનો થઈ શકતો નથી. પર્વતાનેની હરીશે કડક શબ્દોમાં કહ્યું હતું કે, "હત્યાકાંડને લશ્કરી કાર્યવાહી તરીકે રજૂ કરવાથી ગુનેગાર મુક્ત થતો નથી."
આ ઘટનાક્રમ દર્શાવે છે કે પાકિસ્તાન પોતાની આંતરિક અસ્થિરતાને કારણે તેના પડોશીઓ માટે ખતરો બની રહ્યું છે. ભારતે આંતરરાષ્ટ્રીય મંચ પર પાકિસ્તાનની આ હરકતોને ઉજાગર કરીને વિશ્વને બતાવી દીધું છે કે ઈસ્લામાબાદનો એકમાત્ર એજન્ડા ભારત વિરોધી પ્રચાર દ્વારા પોતાની નિષ્ફળતાઓ છુપાવવાનો જ છે.