બેંગલુરુ, તા. 9  : કર્ણાટકમાં ચોમાસાએ આગમન સાથે જ કહેર વર્તાવવાનું શરૂ કરી દીધું છે. રાજ્યના અનેક જિલ્લાઓમાં છેલ્લા 24 કલાકથી ભારે વરસાદ પડી રહ્યો છે, જેના કારણે જનજીવન અસ્તવ્યસ્ત થઈ ગયું છે. ખાસ કરીને બેલગાવી જિલ્લામાં સ્થિતિ સૌથી વધુ વિકટ બની છે.

બેલગાવીમાં મુશળધાર વરસાદને પગલે નદી-નાળા છલકાઈ ગયા છે અને પૂર જેવી સ્થિતિ સર્જાઈ છે. શહેરના અનેક નીચાણવાળા વિસ્તારોમાં ઘૂંટણ સમા પાણી ભરાઈ ગયા છે. રસ્તાઓ પર નદીઓ વહેતી હોય તેવા દ્રશ્યો જોવા મળી રહ્યા છે. અનેક ઘરોમાં વરસાદી પાણી ઘૂસી જતા લોકોને ભારે હાલાકીનો સામનો કરવો પડી રહ્યો છે.

ભારે વરસાદને કારણે જિલ્લાના અનેક ગ્રામ્ય વિસ્તારો સંપર્ક વિહોણા થઈ ગયા છે. રસ્તાઓ ધોવાઈ જતા અને પુલો પર પાણી ફરી વળતા વાહન વ્યવહાર સંપૂર્ણપણે ઠપ્પ થઈ ગયો છે. ખેતરોમાં પણ પાણી ભરાઈ જતા ઊભા પાકને મોટું નુકસાન થવાની ભીતિ સેવાઈ રહી છે.

પરિસ્થિતિની ગંભીરતાને ધ્યાને લઈ વહીવટીતંત્ર એલર્ટ થઈ ગયું છે. NDRF અને SDRFની ટીમોને બેલગાવી ખાતે તૈનાત કરવામાં આવી છે. અસરગ્રસ્ત વિસ્તારોમાંથી લોકોને સલામત સ્થળે ખસેડવાની કામગીરી શરૂ કરી દેવામાં આવી છે. જિલ્લા કલેક્ટર દ્વારા લોકોને જરૂર વગર ઘરની બહાર ન નીકળવા અપીલ કરવામાં આવી છે.

હવામાન વિભાગે આગામી 48 કલાકમાં કર્ણાટકના દરિયાકાંઠાના અને ઉત્તર ભાગના જિલ્લાઓમાં ભારેથી અતિભારે વરસાદની આગાહી કરી છે.