કોલકાતા, તા. ૦૯ જૂન, ૨૦૨૬: પશ્ચિમ બંગાળના રાજકીય ગલિયારાઓમાં સહી બનાવટી (Signature Forgery) કેસને લઈને ગરમાવો વધી ગયો છે. મંગળવારે કોલકાતામાં તત્કાલીન મુખ્યમંત્રી મમતા બેનર્જીના કાલીઘાટ નિવાસસ્થાનની બિલકુલ બાજુમાં આવેલા તૃણમૂલ કોંગ્રેસના પક્ષ કાર્યાલય પર સીઆઈડી (CID) ની ટીમે ધાવા બોલાવતા સનસનાટી મચી ગઈ છે. આ દરોડા સાથે જ રાજ્યમાં સત્તાધારી પક્ષ અને તપાસ એજન્સીઓ વચ્ચેનો સંઘર્ષ વધુ તીવ્ર બન્યો છે.
કાર્યાલયમાં પ્રવેશ માટે એક કલાકનું રસાકસીભર્યું દ્રશ્ય
સીઆઈડીની ટીમ જ્યારે સર્ચ વોરંટ લઈને પહોંચી, ત્યારે તેમને શરૂઆતમાં કાર્યાલયમાં પ્રવેશતા અટકાવવામાં આવ્યા હતા. તૃણમૂલના નેતાઓ અને સુરક્ષા દળો વચ્ચે લગભગ એક કલાક સુધી ઉગ્ર દલીલો ચાલી હતી. પક્ષના ખજાનચી સુભાષિષ ચક્રવર્તીએ દલીલ કરી હતી કે મમતા બેનર્જી અને અભિષેક બેનર્જી દિલ્હીમાં હોવાથી તેમની પરવાનગી વિના પ્રવેશ આપવો અશક્ય છે. જોકે, સીઆઈડી અધિકારીઓએ સ્પષ્ટ કર્યું કે તેઓ કાનૂની પ્રક્રિયાનું પાલન કરી રહ્યા છે અને ત્યારબાદ જ તેમને સાંજે ૪ વાગ્યાની આસપાસ કાર્યાલયમાં પ્રવેશ મળ્યો હતો.
શું છે આ સમગ્ર તપાસનું કેન્દ્ર?
તપાસકર્તાઓના મતે, આ આખો મામલો અમુક ધારાસભ્યોના બનાવટી હસ્તાક્ષર સાથે જોડાયેલો છે. સીઆઈડીનું માનવું છે કે જે બેઠકમાં આ કૌભાંડના કાવતરાં રચાયા હોવાની આશંકા છે, તે આ કાર્યાલયમાં જ યોજાઈ હતી. સીઆઈડી હવે એ જાણવાનો પ્રયાસ કરી રહી છે કે તે દિવસે કોણ કોણ હાજર હતું, કયા દસ્તાવેજો પર ખોટી સહીઓ કરવામાં આવી હતી અને આ સમગ્ર પ્રક્રિયા પાછળ કોનો હાથ હતો. પુરાવા એકત્રિત કરવા માટે સીઆઈડીએ કાર્યાલયના સીસીટીવી ફૂટેજ પણ જપ્ત કર્યા છે.
અભિષેક બેનર્જીની મુશ્કેલીઓ યથાવત
આ કૌભાંડની તપાસ હવે પક્ષના રાષ્ટ્રીય મહાસચિવ અભિષેક બેનર્જી સુધી પહોંચી છે. સીઆઈડીએ તેમને અગાઉ પણ પૂછપરછ માટે નોટિસ ફટકારી હતી, પરંતુ તેમણે વધારાનો સમય માંગતા તપાસમાં હાજર થવાનું ટાળ્યું છે. એક તરફ કેમેક સ્ટ્રીટ સ્થિત તેમના કાર્યાલય પર પણ સીઆઈડીની ટીમ પહોંચી છે, તો બીજી તરફ મમતા બેનર્જી સામે સતત વધી રહેલા આવા કૌભાંડોના આરોપો તેમની રાજકીય છબી માટે મોટા પડકાર સમાન છે.
દારૂ કૌભાંડ બાદ હવે 'બાંગ્લાર બારી' યોજનામાં કથિત ગેરરીતિઓની ચર્ચાઓ વચ્ચે આ સહી બનાવટી કેસે તૃણમૂલ કોંગ્રેસને ભીંસમાં મૂકી દીધી છે. તપાસ એજન્સીઓના આ આક્રમક વલણને જોતા એ સ્પષ્ટ છે કે આગામી દિવસોમાં રાજ્યના રાજકારણમાં ગરમાવો હજુ વધશે.