વોશિંગ્ટન: અમેરિકામાં વિદેશી કુશળ વ્યાવસાયિકો, ખાસ કરીને ભારતીય આઈટી એન્જિનિયરો માટે અત્યંત લોકપ્રિય એવા H-1B વિઝાની ફી પર ચાલી રહેલો હાઈ-વોલ્ટેજ રાજકીય અને કાનૂની ડ્રામા હવે ચરમસીમાએ પહોંચ્યો છે. ટ્રમ્પ વહીવટીતંત્ર દ્વારા H-1B વિઝા અરજીઓ પર લાદવામાં આવેલી $૧૦૦,૦૦૦ (આશરે ₹૮૩ લાખ)ની તોતિંગ ફી પર ફેડરલ કોર્ટે કાનૂની કોરડો વીંઝી તેને સંપૂર્ણપણે રદ કરવાનો ઐતિહાસિક આદેશ આપ્યો છે. મેસેચ્યુસેટ્સની ફેડરલ કોર્ટે સ્પષ્ટ ચુકાદો આપ્યો છે કે આ ફી યુએસ કોંગ્રેસની પૂર્વ મંજૂરી વિના લાદવામાં આવી હોવાથી સંપૂર્ણપણે ગેરકાયદેસર છે. કોર્ટના આ આંચકાજનક નિર્ણય પર અમેરિકી પ્રમુખ ડોનાલ્ડ ટ્રમ્પ ભારે ગુસ્સે ભરાયા છે અને ન્યાયાધીશોની આકરી ટીકા કરતા આ નિર્ણયને "દેશ માટે મોટું નુકસાન અને સંપૂર્ણ પાગલપન" ગણાવ્યો છે.

કેલિફોર્નિયા સહિત અમેરિકાના ૧૯ રાજ્યો દ્વારા દાખલ કરાયેલી સંયુક્ત અરજી બાદ કોર્ટે આ વટહુકમને 'ગેરકાયદેસર કર' ગણાવી ફગાવી દીધો છે. વ્હાઇટ હાઉસે આ ચુકાદા સામે અપીલ કોર્ટમાં જવાનો સ્પષ્ટ સંકેત આપ્યો છે, જ્યારે વ્હાઇટ હાઉસના પ્રવક્તા ટેલર રોજર્સે દલીલ કરી છે કે આ પ્રોગ્રામનો દાયકાઓથી દુરુપયોગ થઈ રહ્યો હતો જેને રોકવો અનિવાર્ય છે. બીજી તરફ, વિપક્ષી ડેમોક્રેટિક નેતાઓ અને કેલિફોર્નિયાના એટર્ની જનરલ રોબ બોન્ટાએ કોર્ટના નિર્ણયને આવકારતા આ જંગી ફીને 'વૈશ્વિક પ્રતિભા પર સીધો હુમલો' ગણાવ્યો છે. રિપબ્લિકન પક્ષના જ કેટલાક કાયદાકારોએ પણ સ્વીકાર્યું છે કે આટલી ઊંચી ફીથી અમેરિકાના ગ્રામીણ વિસ્તારોની શાળાઓ અને હોસ્પિટલોમાં વિદેશી શિક્ષકો અને ડોક્ટરોની અછત સર્જાત.

અમેરિકાની અર્થવ્યવસ્થામાં કરોડરજ્જુ સમાન ગણાતી  વ્હાઇટ વર્કર સિસ્ટમ હેઠળ દર વર્ષે ૬૫,૦૦૦ સામાન્ય અને ૨૦,૦૦૦ ઉચ્ચ શૈક્ષણિક લાયકાત ધરાવતા H-1B વિઝા જારી કરવામાં આવે છે. હાલમાં અમેરિકામાં આશરે ૭,૩૦,૦૦૦ વિઝા ધારકો અને તેમના ૫,૫૦,૦૦૦ આશ્રિતો વસવાટ કરે છે, જેમાં સૌથી મોટી ભાગીદારી ભારતીય ટેકનોલોજી, એન્જિનિયરિંગ અને ફાઇનાન્સ વ્યાવસાયિકોની છે. એરિઝોનાના કોંગ્રેસમેન એલી ક્રેન જેવા કડકપંથી નેતાઓ ભલે "H-1B વિઝા દુરુપયોગ નિયંત્રણ ૨૦૨૬" કાયદા હેઠળ કોર્ટના આદેશને ફગાવી દેવાની માંગ કરી રહ્યા હોય, પરંતુ કોર્ટના આ તાજા નિર્ણયથી ટેક સેક્ટરની અમેરિકી કંપનીઓ અને ત્યાં જવા ઈચ્છતા હજારો ભારતીય યુવાનોએ મોટી રાહતનો શ્વાસ લીધો છે.