તેલ અવીવ: ઈઝરાયેલના વડાપ્રધાન બેન્જામિન નેતન્યાહુએ કેબિનેટની બેઠકમાં એક અત્યંત ગંભીર ચેતવણી ઉચ્ચારી છે કે, જો જરૂર પડશે તો ઈઝરાયેલ અમેરિકાના કોઈપણ જાતના ટેકા વિના એકલા હાથે ઈરાન સામે લડવા માટે સક્ષમ છે અને એ પરિસ્થિતિ માટે દેશે હવે તૈયાર રહેવું પડશે.
કેબિનેટની બેઠક દરમિયાન નેતન્યાહુએ સ્પષ્ટ શબ્દોમાં જણાવ્યું હતું કે એવી પરિસ્થિતિ નિર્માણ પામી શકે છે જ્યાં અમેરિકી સમર્થન વિના ઈરાનનો સામનો કરવો પડે. આ સંજોગોમાં લશ્કરી શસ્ત્રસરંજામ, હથિયારો અને વૈશ્વિક રાજનીતિમાં એકલતાના તમામ આર્થિક અને રાજદ્વારી ખર્ચ ઈઝરાયેલે પોતે જ ભોગવવા પડશે.
તેમણે ઉમેર્યું હતું કે, "અમે આવી ખરાબ સ્થિતિમાં જવા માંગતા નથી, પરંતુ અમે જાણીએ છીએ કે અમે એકલા પણ મક્કમતાથી લડી શકીએ છીએ." આ આક્રમક નિવેદન એવા સમયે આવ્યું છે જ્યારે ઈઝરાયેલ અને ઈરાન વચ્ચે યુદ્ધનો તણાવ તેની ચરમસીમા પર પહોંચી ગયો છે.
વૈશ્વિક અખબારો અને આંતરરાષ્ટ્રીય મીડિયા રિપોર્ટ્સ અનુસાર, ઈઝરાયેલ હવે આંતરરાષ્ટ્રીય દબાણની પરવા કર્યા વિના પોતાની સુરક્ષા માટે કોઈપણ હદે જવા તૈયાર છે. આ સત્તાવાર નિવેદને પશ્ચિમ એશિયામાં યુદ્ધના નવા અને અત્યંત ભયાનક તબક્કાનો સ્પષ્ટ ઈશારો કર્યો છે.