મુંબઈ: બુલિયન માર્કેટમાં એકાએક મોટો ભૂકંપ આવ્યો છે. વાયદા બજાર ખુલતાની સાથે જ કિંમતી ધાતુઓમાં ભારે વેચવાલી જોવા મળી હતી, જેના કારણે સોના અને ચાંદીના ભાવમાં ઐતિહાસિક ઘટાડો નોંધાયો છે. સોનાના ભાવમાં એક જ ઝાટકે ૨૫૦૦ રૂપિયાથી વધુનો મોટો કડાકો બોલી ગયો છે. આ જંગી ઘટાડાને પગલે સોનાનો ભાવ હવે દોઢ લાખ રૂપિયાની મહત્વની સપાટી તોડીને નીચે પટકાયો છે.

વૈશ્વિક બજારોમાં જોવા મળેલા નરમાઈના ટ્રેન્ડ અને અમેરિકી ડોલરની વધઘટની સીધી અસર ભારતીય બજારો પર પડી રહી છે. રોકાણકારો દ્વારા મોટા પાયે નફાબુકિંગ કરવામાં આવતા બજારમાં ગભરાટનો માહોલ ફેલાયો છે. આંતરરાષ્ટ્રીય સ્તરે પ્રવર્તતી આર્થિક અનિશ્ચિતતાઓએ કિંમતી ધાતુઓની ચમક ઝાંખી કરી નાખી છે.

બીજી તરફ, ચાંદીમાં પણ આજે અંદાજિત ૪૫૦૦ રૂપિયાનો જંગી કડાકો બોલી ગયો છે. ઔદ્યોગિક માંગમાં થયેલા અચાનક ઘટાડા અને વૈશ્વિક બજારોના દબાણને કારણે ચાંદીના ભાવ તળિયે બેસી ગયા છે. આ કડાકાને પગલે જ્વેલર્સ અને છૂટક ખરીદદારોમાં ભારે આશ્ચર્ય ફેલાયું છે અને આગામી દિવસોમાં ભાવ વધુ ગગડે તેવી શક્યતા સેવાઈ રહી છે.