નવી દિલ્હી : ભારતીય લોકશાહી માટે આજે એક ઐતિહાસિક દિવસ છે. વડાપ્રધાન નરેન્દ્ર મોદીએ દેશના રાજકીય ઇતિહાસમાં એક નવો વિક્રમ સ્થાપિત કર્યો છે. સતત ૪,૩૯૯ દિવસ સુધી વડાપ્રધાન પદની જવાબદારી નિભાવીને તેમણે ભારતના પ્રથમ વડાપ્રધાન જવાહરલાલ નેહરુનો સૌથી લાંબા સમય સુધી ચૂંટાયેલા વડાપ્રધાન તરીકેનો રેકોર્ડ તોડી નાખ્યો છે. આ સિદ્ધિ તેમના નેતૃત્વમાં દેશની સ્થિરતા અને વિકાસની ગાથાનું પ્રતીક બની ગઈ છે.
પોતાના આ ઐતિહાસિક સીમાચિહ્ન પર પીએમ મોદીએ સોશિયલ મીડિયા પ્લેટફોર્મ 'X' પર ખૂબ જ વિનમ્રતા સાથે પોતાની ભાવનાઓ વ્યક્ત કરી હતી. તેમણે જણાવ્યું કે, "જનસેવા એ સુશાસનની સૌથી મોટી કસોટી છે. જે લોકો અતૂટ પ્રતિબદ્ધતા, શિસ્ત અને કર્તવ્યની ભાવના સાથે કાર્ય કરે છે, તેઓ જ જનતાનો સાચો વિશ્વાસ જીતવામાં સફળ રહે છે." તેમના આ શબ્દોમાં સત્તા કરતાં સેવાની પ્રાધાન્યતા સ્પષ્ટપણે દેખાઈ આવે છે.
૨૦૧૪માં પ્રથમવાર સત્તા સંભાળ્યા બાદ ૨૦૧૯ અને ૨૦૨૪માં પ્રચંડ જનાદેશ સાથે સતત ત્રીજીવાર વડાપ્રધાન બનનારા મોદી ભારતના ઇતિહાસમાં અનોખા નેતા સાબિત થયા છે. તેમના ૧૨ વર્ષના કાર્યકાળમાં દેશે અનેક ક્રાંતિકારી બદલાવ જોયા છે. નવી સંસદ ભવનનું નિર્માણ હોય, સેન્ટ્રલ વિસ્ટા પ્રોજેક્ટ, સ્ટેચ્યુ ઓફ યુનિટીનું લોકાર્પણ કે પછી વંદે ભારત અને નમો ભારત જેવી આધુનિક ટ્રેનો—મોદી સરકારે માળખાગત સુવિધાઓમાં નવા આયામો સિદ્ધ કર્યા છે.
આ ઐતિહાસિક સિદ્ધિને ઉજવવા માટે નવી દિલ્હીના પ્રતિષ્ઠિત 'ભારત મંડપમ' ખાતે નેશનલ ડેમોક્રેટિક એલાયન્સ (NDA) ની એક ભવ્ય બેઠકનું આયોજન કરવામાં આવ્યું છે. આ સભામાં ભાજપના દિગ્ગજ નેતાઓ, NDA શાસિત રાજ્યોના મુખ્યમંત્રીઓ અને તમામ ગઠબંધન ભાગીદારો ઉપસ્થિત રહી પીએમ મોદીને અભિનંદન આપશે. સૂત્રોના જણાવ્યા અનુસાર, આ બેઠકમાં ગઠબંધનની ભાવિ નીતિઓ પર ચર્ચા કરવામાં આવશે અને વડાપ્રધાનની આ અજોડ સિદ્ધિ બદલ એક વિશેષ પ્રશસ્તિ ઠરાવ પણ પસાર કરવામાં આવશે.

નેહરુજીનો કાર્યકાળ ૧૯૫૨થી ગણવામાં આવે છે, જેની સરખામણીમાં મોદીનું આ સતત નેતૃત્વ ભારતીય જનતાના વિશ્વાસનું પ્રતિબિંબ છે. ઇન્દિરા ગાંધીનો કાર્યકાળ લાંબો રહ્યો હોવા છતાં, તે સતત ન હતો, તેથી મોદી અત્યારે ભારતના ઇતિહાસમાં સૌથી લાંબા સમય સુધી 'સતત' સેવા આપનાર ચૂંટાયેલા વડાપ્રધાન તરીકે અજેય બની ગયા છે.