લંડન : બોમ્બે હાઈકોર્ટના પૂર્વ ન્યાયાધીશ ગૌતમ પટેલ અને તેમના પરિવાર માટે યુનાઈટેડ કિંગડમમાં રહેવું મુશ્કેલ બની ગયું છે. ન્યાયાધીશ પટેલ દ્વારા ૨૦૨૪માં દાઉદી બોહરા સમુદાયના ઉત્તરાધિકાર વિવાદમાં આપવામાં આવેલા સીમાચિહ્નરૂપ ચુકાદાના પડઘા હવે સીધા વિદેશમાં સંભળાઈ રહ્યા છે. હર્ટફોર્ડશાયર (યુકે) માં રહેતી તેમની પુત્રી અદિતિ પટેલ અને પરિવારને ગંભીર ધમકીઓ મળ્યા બાદ અને શારીરિક હુમલા થયા બાદ, સ્થાનિક પોલીસે હવે પરિવારને વિશેષ સુરક્ષા કવચ પૂરું પાડ્યું છે.
પરિવાર પર સતત હુમલા અને ધમકીઓનો સિલસિલો:
પોલીસ અહેવાલો મુજબ, ઓગસ્ટ ૨૦૨૫ થી જૂન ૨૦૨૬ દરમિયાન ન્યાયાધીશ પટેલના પરિવારને લક્ષ્ય બનાવીને અનેક ચોંકાવનારી ઘટનાઓ બની છે. જેમાં ઘરમાં ચોરીનો પ્રયાસ, પરિવારને ધમકીભર્યા પત્રો અને ડિજિટલ સંદેશાઓનો સમાવેશ થાય છે. સૌથી ગંભીર ઘટના એપ્રિલ ૨૦૨૬માં બની હતી, જ્યારે એક માસ્ક પહેરેલા હુમલાખોરે અદિતિ પટેલ પર હુમલો કર્યો હતો, જેમાં તેમનું નાક ફ્રેક્ચર થયું હતું. તાજેતરમાં જૂન ૨૦૨૬માં પણ તેમને વધુ ધમકીભર્યા સંદેશાઓ મળ્યા છે, જેની અત્યારે યુકે પોલીસના ક્રિમિનલ ઇન્વેસ્ટિગેશન ડિપાર્ટમેન્ટ દ્વારા ઝીણવટભરી તપાસ ચાલી રહી છે.
વિવાદનું મૂળ શું છે?
આ સમગ્ર મામલો ૨૦૨૪માં ન્યાયાધીશ ગૌતમ પટેલની બેંચ દ્વારા આપવામાં આવેલા ચુકાદા સાથે જોડાયેલો છે. આ ચુકાદામાં સૈયદના મુફદ્દલ સૈફુદ્દીનને દાઉદી બોહરા સમુદાયના ૫૩મા દાઈ અલ-મુતલક તરીકે માન્યતા આપવામાં આવી હતી અને તેમના વિરોધી તાહેર ફખરુદ્દીનના દાવાને ફગાવી દેવામાં આવ્યો હતો. આ ચુકાદા બાદ ન્યાયાધીશ પટેલ અને તેમના પરિવારને સતત નિશાન બનાવવામાં આવી રહ્યા હોવાના આરોપો છે.
ભારતીય કાનૂની સમુદાયમાં આક્રોશ:

આ ઘટનાએ ભારતના કાનૂની અને ન્યાયિક જગતમાં ભારે હલચલ મચાવી છે. ૮ જૂનના રોજ બોમ્બે બાર એસોસિએશને એક કડક ઠરાવ પસાર કરીને આ ઘટનાને 'ન્યાયતંત્રની સ્વતંત્રતા અને કાયદાના શાસન પરનો સીધો હુમલો' ગણાવ્યો છે. એસોસિએશને ભારતના વિદેશ મંત્રાલયને અપીલ કરી છે કે તેઓ યુકેના સત્તાધિકારીઓ સાથે વાતચીત કરીને ન્યાયાધીશ પટેલના પરિવારની સુરક્ષા સુનિશ્ચિત કરે. ન્યાયમૂર્તિ જેવી ગરિમાપૂર્ણ વ્યક્તિના પરિવારને આ પ્રકારના હિંસક હુમલાઓનો સામનો કરવો પડવો એ લોકશાહી માટે ગંભીર ચિંતાનો વિષય છે. હાલ યુકે પોલીસ આ બાબતને ખૂબ જ ગંભીરતાથી લઈ રહી છે અને ગુનેગારોને પકડવા માટેના તમામ સંભવિત પ્રયાસો કરી રહી છે.