ઉત્તર કોરિયાના નેતા કિમ જોંગ ઉનનો એક નવો વીડિયો સોશિયલ મીડિયા પર ભારે ચર્ચાનો વિષય બન્યો છે. આ વીડિયોમાં કિમ જોંગ ઉનના એક સભા ખંડમાં પ્રવેશતાની સાથે જ ત્યાં હાજર તમામ અધિકારીઓ કોઈ મશીન કે રોબોટની જેમ સતત અને અત્યંત લયબદ્ધ રીતે તાળીઓ પાડતા જોવા મળે છે. પત્રકાર ઉમાશંકર સિંહે આ વીડિયો શેર કરીને તાનાશાહના આ શાસન પર કટાક્ષ કર્યો છે.

સોશિયલ મીડિયા પ્લેટફોર્મ એક્સ પર પત્રકાર ઉમાશંકર સિંહે ઉત્તર કોરિયાના તાનાશાહ કિમ જોંગ ઉનનો ૧૪ સેકન્ડનો એક વીડિયો શેર કર્યો છે. આ વીડિયો હાલ ખૂબ વાયરલ થઈ રહ્યો છે અને લોકોના આશ્ચર્યનું કારણ બની રહ્યો છે.

વીડિયોમાં સ્પષ્ટ જોઈ શકાય છે કે કિમ જોંગ ઉન પોતાના કેટલાક સહયોગીઓ સાથે એક બેઠક ખંડમાં પ્રવેશે છે. તેમના ખંડમાં આવતાની સાથે જ ત્યાં પહેલેથી જ હાજર તમામ લોકો અને લશ્કરી અધિકારીઓ એકસાથે ઊભા થઈ જાય છે અને વીજળીની  ઝડપે તાળીઓ પાડવા લાગે છે. આ તમામ લોકોની તાળીઓ પાડવાની રીત, તેમની શારીરિક ભાષા અને ગતિ એટલી સમાન અને સતત છે કે પહેલી નજરે તે કોઈ એનિમેશન અથવા કમ્પ્યુટર દ્વારા બનાવેલો નકલી વીડિયો જ લાગે છે. 

કિમ જોંગ ઉન પોતાની ખુરશી પાસે જઈને ઊભા રહે છે અને ત્યારબાદ તેઓ ખુરશી પર બેસી જાય છે, છતાં પણ લોકોની તાળીઓ કોઈ યાંત્રિક રમકડાની જેમ અવિરત ચાલુ જ રહે છે.

આ વીડિયોની ક્લિપ શેર કરતા પત્રકાર ઉમાશંકર સિંહે પોતાની પોસ્ટમાં હિન્દીમાં લખ્યું છે કે "એવો બાદશાહ જ કેવો કે જેના આવવા પર તેના દરબારીઓ આ રીતે તાળીઓ ન પાડે ? આ એનિમેટેડ લાગશે પણ આ સાચી તાળીઓ છે." 

આ દ્રશ્ય ઉત્તર કોરિયાના કડક શાસન અને કિમ જોંગ ઉન પ્રત્યેના ત્યાંના લોકોના ડર અને કડક શિસ્તને ઉજાગર કરે છે.