નવી દિલ્હી : મધ્યપ્રદેશમાં આગામી સમયમાં યોજાનારી રાજ્યસભાની ચૂંટણી પૂર્વે જ રાજકીય ગરમાવો ચરમસીમાએ પહોંચી ગયો છે. કોંગ્રેસના દિગ્ગજ ઉમેદવાર અને પૂર્વ સાંસદ મીનાક્ષી નટરાજનના નામાંકન પત્રો (ફોર્મ) રિટર્નિંગ ઓફિસર દ્વારા ટેકનિકલ કારણોસર નકારી કાઢવામાં આવતાં કોંગ્રેસ કેમ્પમાં ભારે દોડધામ મચી ગઈ છે. આ કાનૂની અને રાજકીય કટોકટી વચ્ચે મીનાક્ષી નટરાજન વતી ગુરુવારે તાત્કાલિક સુપ્રીમ કોર્ટમાં વિશેષ અરજી દાખલ કરવામાં આવી હતી. સુપ્રીમ કોર્ટે આ મામલાની ગંભીરતાને ધ્યાનમાં લઈને શુક્રવારે સુનાવણી કરવા સંમતિ આપી દીધી છે, પરંતુ વચગાળાની રાહત તરીકે ચૂંટણીના પરિણામોની જાહેરાત પર કોઈ પણ પ્રકારની રોક લગાવવાનો સ્પષ્ટ ઇનકાર કરી દીધો છે.
અદાલતમાં મીનાક્ષી નટરાજનનો પક્ષ રાખતા દેશના વરિષ્ઠ વકીલ અને કોંગ્રેસના નેતા અભિષેક મનુ સિંઘવીએ ચીફ જસ્ટિસ સમક્ષ તાકીદની સુનાવણીની માંગ કરી હતી. સિંઘવીએ દલીલ કરી હતી કે, "મીનાક્ષી નટરાજન સામે તેલંગાણામાં માત્ર એક ખાનગી ફરિયાદના આધારે કોર્ટે સામાન્ય સમન્સ (નોટિસ) જારી કર્યા છે. તેમની સામે કોઈ ઔપચારિક એફઆઈઆર, પોલીસ તપાસ કે ચાર્જશીટ દાખલ થઈ નથી. ચૂંટણી નિયમો અનુસાર, આવા પ્રારંભિક તબક્કાને 'પેન્ડિંગ ફોજદારી કેસ' ગણી શકાય નહીં, જેથી ફોર્મમાં તેનો ખુલાસો કરવો ફરજિયાત નથી. રિટર્નિંગ ઓફિસરે કાયદાનું ખોટું અર્થઘટન કરીને પક્ષપાતી વલણ અપનાવ્યું છે અને નામાંકન ખોટી રીતે રદ કર્યું છે." ન્યાયાધીશ પ્રશાંત મિશ્રા અને ન્યાયાધીશ એ. એસ. ચાંદુરકરની ખંડપીઠે શરૂઆતમાં જણાવ્યું હતું કે આવી સ્થિતિમાં ચૂંટણી અરજી (ઇલેક્શન પિટિશન) જ એકમાત્ર ઉપાય છે, પરંતુ અંતે તેઓ શુક્રવારે દલીલો સાંભળવા સંમત થયા હતા. ભાજપના વરિષ્ઠ વકીલ મુકુલ રોહતગીએ આ અરજીનો જોરદાર વિરોધ કર્યો હતો.
ભાજપના વાંધા બાદ ફોર્મ થયું અસ્વીકૃત
આ સમગ્ર વિવાદની શરૂઆત ત્યારે થઈ જ્યારે ભાજપના ઉમેદવાર મહેશ કેવટે મીનાક્ષી નટરાજનના નામાંકન સામે લેખિત વાંધો ઉઠાવ્યો હતો. ભાજપના પ્રતિનિધિઓએ ચૂંટણી અધિકારી સમક્ષ પુરાવા રજૂ કરતા આક્ષેપ કર્યો હતો કે સુપ્રીમ કોર્ટની માર્ગદર્શિકા મુજબ જ્યારે કોઈ અદાલત દ્વારા નોટિસ કે સમન્સ જારી થાય, ત્યારથી જ કાનૂની કાર્યવાહી શરૂ થયેલી ગણાય છે અને ઉમેદવારે એફિડેવિટમાં તેની વિગતો જાહેર કરવી પડે છે, જે નટરાજને છુપાવી છે. બીજી તરફ, કોંગ્રેસે આક્ષેપ કર્યો છે કે ભાજપે સત્તાનો દુરુપયોગ કરીને લોકશાહીની હત્યા કરવાનું 'બંધારણીય ષડયંત્ર' ઘડ્યું છે, જ્યારે ભાજપે વળતો પ્રહાર કરતા કહ્યું છે કે ચૂંટણી અધિકારીઓએ માત્ર બંધારણીય અને કાનૂની જોગવાઈઓનું જ પાલન કર્યું છે.
મધ્યપ્રદેશનું રાજકીય ગણિત બદલાયું, કોંગ્રેસ મુશ્કેલીમાં
મીનાક્ષી નટરાજનનું ફોર્મ અસ્વીકૃત થવાના કારણે મધ્યપ્રદેશના રાજ્યસભા ચૂંટણીના સમીકરણો સંપૂર્ણપણે બદલાઈ ગયા છે અને કોંગ્રેસ બેકફૂટ પર આવી ગઈ છે. ૨૩૦ સભ્યો ધરાવતી મધ્યપ્રદેશ વિધાનસભામાં ભાજપ પાસે પહેલેથી જ પ્રચંડ બહુમતી છે, જેના કારણે તે ત્રણમાંથી બે બેઠકો આસાનીથી જીતી રહ્યું હતું. કોંગ્રેસ પાસે સંખ્યાબળ મુજબ એક બેઠક સુરક્ષિત હતી અને તેના પર નટરાજનની જીત નક્કી માનવામાં આવતી હતી. પરંતુ હવે તેમનું નામાંકન રદ થતાં ભાજપ ત્રીજી બેઠક પર પણ કબ્જો જમાવી લે તેવી પ્રબળ શક્યતા ઊભી થઈ છે. હવે કોંગ્રેસનું ભવિષ્ય અને રાજ્યસભાની આ બેઠક સંપૂર્ણપણે શુક્રવારે સુપ્રીમ કોર્ટ તરફથી મળનારી કાનૂની રાહત પર નિર્ભર છે.